Mynta yn kiew rynsan ïakhun 10 ngut ki rang & thei ka jylla ha ka MMA Fight Night

Shillong, Naiwieng 15: Ka sien ba nyngkong ha ka tamasa Cherry Blossom ka Rockski Entertainment Group ryngkat ka jingkyrshan na ka tnat jngohkai jong ka Sorkar Jylla Meghalaya kan pynlong ïa ka lympung ïakhun MMA ha kaba yn wan ïashimbynta da katto katne ngut ki rang bad thei ïakhun MMA kiba la paw nabar jylla kynthup bad shiphew ngut napoh Meghalaya.
ïa kane ka rynsan ïakhun ‘MMA Fight Night’ jong ka tamasa Cherry Blossom kan long ha kane ka 16 tarik Naiwieng, ha Dhanketi ha kaba yn sakhi haduh 12 tylli ki jingïakhun (bout) ba kynthup ïa 5 tylli ki jingïakhun ba kyrpang lane Main Card ha ki kyrdan bapher bapher.
Nalor ka Meghalaya, kiwei pat ki nongïakhun MMA ki jylla ka ka thaiñ shatei lammihngi ki ban shimbynta ha kane ka lympung ki long na Assam, Manipur, Mizoram, Arunachal Pradesh bad na Nagaland. Katba kiba nabar ka thaiñ shatei lammihngi ki long na Uttarakhand, na Kolkata, Maharashtra bad uwei nabar ri, kata na Afganistan.
Kin don lai ngut ki rangïakhun ka jylla ki ban ïoh ban ïakhun ha ka thup ba kyrpang (Main Card), katba hynñiew ngut (4 shynrang bad 3 kynthei) kin ïakhun ha ka thup Prelims.
Ki ban ïakhun ha ka thup ba kyrpang ki long u Donbestar Syiemlieh u ban aireng ïa u Monjit na Assam ha ka kyrdan Flyweight Bout, nangta u Darren Kharshandi u ban aireng ïa u Lianhun na Manipur ha ka Bantamweight Bout, bad u wei na ki rangïakhun MMA ba la paw ka jylla- u Johny Nongrum u ban ïakhun ha ka Middleweight Bout pyrshah ïa u Abir Khan na Kolkatta.
Katba ha ka Prelims Card ki kynthup ïa u Franky un ïakhun pyrshah ïa u Mangesh na Maharashtra ha ka Bantamweight Bout, u Kevin Mark pyrshah ïa u Pankaj na Assam ha ka kyrdan Fly weight Bout, nangta u Raymond Bina pyrshah ïa u Dame Suchiang (Meghalaya baroh ar) ha ka Straw Weight Bout.
Yn sakhi ruh ïa ar tylli ki jingïakhun jong ki kynthei, ha kaba ka jylla ka la sei ïa lai ngut, kine ki kynthup ïa ka Ribha Sunn ka ban ïakhun pyrshah ïa ka Tonia na Assam ha ka kyrdan Atom Weight Bout, nangta ka jingïakhun ha ka Catch Weight Bout hapdeng arngut ki thei ka jylla, kata hapdeng ka Genevieve Pakma pyrshah ïa ka Iohtilin Wankhar.