Shillong, Nailur 29 : Ka Mawlai SC kaba la ïoh rah nam lahduh ïa ka OC Blue Shillong Premier League 2021-22 mynta ka sngi Thohdieng kan ïakhun khadduh pyrshah ïa ka Langsning FC kaba dei ruh ka jingïalehkai kaba khadduh jong katei ka lympung mynta ka samoi ha madan MFA Third Ground, Polo, Shillong.
Ka jingïalehkai hadpeng kitei ki ar tylli ki team kan long ha ka por 2:15 baje janmiet ha kaba u Myntri ka tnad ki kam ïalehkai u Bah Banteidor Lyngdoh un ïadonlang kum u kongsan.
Kane ka lympung ïalehkai OC Blue SPL kadei ruh ka jingïalehkai kaba kham kyrpang ha kaba ka la wan phai biang kum ka lympung ïalehkai phutbol kaba hehduh hapoh ka jylla hadien ka jingshah pynthut ha ka khlam jingpang Covid-19.
Kadei ruh kaba kham kyrpang na bynta ka Mawlai SC kaba la wanphai biang sha katei ka lympung hadien bun tylli ki snem ba ka la sahkut ha ka jingïalehkai First Division hynrei ka la ïoh rah syndon pynban ïa ka nam lahduh. Ka Mawlai ka la lah shisha ban ïalehkai bha ha kane ka samooi ha kaba ka la khur nam jop 10 sien ha ki 13 sien ïalehkai bad kaba la shah thep tang hynñiew kol bad thep haduh 31 kol.
Ka jingïalehkai mynta ka sngi kan dei beit satang na bynta ka kyrdan kaba ar. Ka Rangdajied United FC, kaba la ïakhun khadduh ha ka sngi Nyngkong ka kamai 28 poiñ katba ka Langsning lada jia ba ka jop ïa ka Mawlai kan ïoh bat kyrdan ba ar.
