Shillong, Nailar 18: Ka madan Jawaharlal Nehru Stadium, Polo, ka long ba la pynkhreh ban pdiang biang ïa ka jingïakhun ‘NorthEast Derby’ ha kaba ka NorthEast United FC, kaba bat ïa ka burom lahduh, kan ïakhun pyrshah ïa ka Shillong Lajong FC ha ka semi-final ba nyngkong jong ka 134th IndianOil Durand Cup, ban pynurlong biang ïa semi final jong ka samoi ba ladep
Ka NorthEast ka la pynliem da 3-0 ïa ka Shillong Lajong ha u snem ba la dep ha ka lynti jong ki ban rah ïa ka nam lahduh, hynrei mynta ka kynti kane ka kynhun I-League ka la kut jingmut ban wanrah ïa ka jingïakhun kaba kham khlaiñ. Ka jingïalehkai la buh ban sdang ha ka por 7 baje janmiet.
Ka lynti ïaid sha ka semi final jong ka NEUFC ka la sdang da kaba lamkhmat hakhlieh duh jong ka Group E bad jop ïa ka jingïalehkai derby pyrshah ïa ka Lajong da 2-1, nangta da 3-1 kol pyrshah ïa ka Malaysian Armed Forces bad ka la ïakhaid da 2-2 kol bad ka Rangdajied United. Ki la bteng ïa ka rukom lehkai kaba khlaiñ jong ki ha ka quaterfinal, ban pynliem noh ïa ka Bodoland FC da 4-0 kol ha Kokrajhar, ha kaba u rangïalehkai ka Morocco, u Alaaeddine Ajaraie u la pynkhihjar arsien ban kyntiew ïa ka jingkheiñ jong u ha ka lympung ïalehkai sha ka hynñiew kol.
“Ngi la ai ïa la ka jong ka 100% bad Ngin ïai bteng ban leh kumjuh lashai ka sngi. Ka jingtynjuh ka don beit, hynrei Ngi tip kumno ban tehlakam ïa ka. Ngi batai ïa ka kynhun jong ngi kum ka Wolfpack (kynhun ki suri).” la ong u Michel Zabaco (kapten jong ka NEUFC).
Na ka liang jong u Head Coach ka NEUFC u Juan Pedro Benali u la pynsngew da kaba ong, “Ka Shillong Lajong ka dei ka kynhun kaba kham khlaiñ shibun mynta u snem. Barabor ka long kaba jwat ban ïakhun pyrshah ïa ki, bad lashai kan ym long kaba pher. U snem ba ladep udei u snem ba ladep, lashai kadei ka jingïakhun kaba thymmai.”
Katba ka Shillong Lajong ka la pyndep ha ka kyrdan ba ar (runners-up) ha kane kajuh ka Group, da kaba pynliem kput ïa ka Malaysian Armed Forces haduh 6-0, bad da 3-1 ïa ka Rangdajied United, hynrei ka la shah rem da 2-1 ha ka NEUFC. Ha ka Quarter final, ka kynhun u Birendra Thapa ka la wanphai hadien ba shah lamkhmat ban jop da 2-1 kol ïa ka Indian Navy FT lyngba ki ar tylli ki kol na u Damaitphang Lyngdoh bad u Everbrightson Sana.
Da ka jingïatreilang u Phrangki Buam, Everbrightson Sana bad u Figo Syndai ki la ïoh ban pynkhih 9 naki 12 tylli ki kol ba ka Lajong ka la ïoh ban thep haduh mynta. Katba u Kenstar Kharshong kum u kapten u khmih bad pynïaid ïa ki rangïalehkai ba shadien.
“Ngi khmih lynti ban ïohi ïa ki nongkyrshan ha ki jaka shong. Ka jingkyrshan jong ki ka ai mynsiem shisha ïa Ngi, namar khlem ma ki ngim long ei ei. Ngi la pynkhreh na ka bynta ka jingïakhun lashai ka sngi, Ngi tip ba ka dei ka jingïakhun do-or-die (jop ne rem), bad Ngi long kiba la pynkhreh ban aiti lut ïa kiei kiei baroh kiba Ngi don,” la ong u Kenstar Kharshong.
U coach ka Lajong u Thapa u la ong: “Ka kynhun ka kham sngewskhem haba ïanujor bad u snem ba la dep. Ngi la shah rem haki ar sien, hynrei ka rukom treikam jong Ngi kan long kaba pher ha ka jingïakhun lashai ka sngi. Kan long ka jingïakhun kaba jwat.”
Lah ban kdew ba ki 90 minit jong kane ka derby ka long kaba kongsan ïa baroh ar tylli ki kynhun namar kadei ka lynnong ka ban rai la ka NorthEast United kan dang jam ne em sa shi sienjam ban ïada ïa ka nam lahduh jong ka, lane ka lah ban rai ba ka Shillong Lajong kan rung sha ka phainal kaba nyngkong eh jong ka Durand Cup.
Shuwa ban jam sha kane ka jingïakhun semi final hapdeng ka Lajong bad ka NorthEast United ki paidbah ki la pynpaw ïa ka jingkyrshan jong ki ïa la ki jong ki kynhun ha ki rynsan social meadia, ha kaba ki nongkyrshan ka NEUFC ki la pyllait ïa ka jingthoh kaba ong “Semis bound—Let’s go! #StrongerAsOne”, katba ki nongkyrshan ka Lajong ki la ïatyllilang ryngkat ka jingthoh “Sarong ïa ka Lajong! Fill JN Stadium”.
Lah ban kdew ba ka jingïaknieh tiket na ka bynta kane ka jingïakhun ka la jur bha, ha kaba tang ha ka sngi U Blei baroh ki tiket la die lut tang hapoh katto katne minit, bad la khmihlynti ba ka madan JN Stadium kan dap smam da u paid nongkyrshan ban sakhi ïa ka jingïakhun NorthEast Derby hapdeng ka Lajong bad ka NEUFC.
