Shillong, Naiwieng 11 : Ka rynsan ka la long kaba la pynkhreh, ha kaba ka jingïaknieh ïa ka nam lahduh ka lympung Meghalaya Women’s State League 2025, ka Meghalaya Football Asociation, hapdeng artylli ki kynhun katta ka Jakrem SC bad Na Rympei Football Academy, kin ïakhun ban ïoh ban rah ïa kane ka nam ha ka sien kaba nyngkong ba ka MFA kan lah ban pynlong ïa ka lympung ba kyrpang ïa ki khun samla kynthei.
Ka phainal jong kane ka jingïakhun la buh ba kan long mynta ka sngi Balang ha ka por 4:00 baje janmiet, ha madan SSA Stadium, First Ground, Polo.
Ha kane ka snem ba la sang nyngkong, la don kumba 20 tylli ki kynhun kiba la wan ban ïashim bynta, ha kaba ia ka pyrda kane ka lympung la plie ïa ka ha ka 20 tarik u Nailur mynta ka snem, bad haba khein kyllum tad shi sngi shwa jong ka phainal, la lah ban pynlong haduh 33 tylli ki jingïalehkai.
Kaba ktik bad pynshon jingmut bha ïa ki nongkit kam ka MFA ka long ba dei lyngba kane ka lympung ba kan plie lad ïa ka kynhun ki thei ïalehkai phutbol ka jylla ba kin lah ruh wat ban poi ïashim bynta sha ka lympung ka Indian Women’s League.
Kumba ka long ïa mynta, kum ka jylla ka dap da ka jingsngew sarong, ba lai ngut ki samla ïalehkai ba kynthup ïa ka Bonifilia Shullai, Alisha Lyngdoh bad ka Ribansi Jamu ki la ïoh ban da mihkhmat ïa ka ri ha ka kyrdan ïakhun ka U-17 bad ka U-20, kiba la bteng ban da jam artad lang shakhmat kum ka kynhun sha ka lympung jong ka Asian Football Confederation.
Lah ban kdew hangne ba kynhun ïalehkai ka Jakrem ka wan mih khmat lyngba ka Mawkyrwat District Sports Association, katba ka kynhun ïalehkai ka Na Rympei FA, ka wan ba kan mihkhmat na Ri-Bhoi District Sports Association bad ba la khmih lynti ba kane ka jingïakhun hi kan long kaba shongshit, ïakhaid bad itynnad bha.
