Mynta yn buh maw nongrim u CM ïa ka projek ba 14 klur ban pynitynnad ïa ka ïewduh

Shillong, Nailar 13 : Tang hadien ar bnai ba u Myntri Rangbah u Conrad K Sangma, u Symbud Myntri Rangbah bah Prestone Tynsong bad u Myntri kam jngohkai u bah Paul Lyngdoh ki la leit jurip ïa ka ïewduh bad pynbna ruh ban theh ïa ka song jingïarap ban pynbha bad pynitynnad ïa ka ïewduh, kane ka sorkar MDA hapoh ka jingïalam ka NPP kam heh tang ka ktien ne kular tang ka ktien hynrei ka leh ruh bad ki kam namar lashai ka sngi hi kata ka 13 tarik Nailar 2025 u Myntri Rangbah un buh maw nongrim ïa ka projek ba 14 klur tyngka na ka bynta ban shna pynbha bad pynitynnad ïa ka ïewduh. Kan long ka sngi ban sah jingkynmaw ïa ka ïewduh namar kan long ka sien ba nyngkong ba kan ïoh jingïarap haduh 14 klur bad nalor kane la ïathuh da uwei u Myntri sorkar ba ka thong jongka sorkar ka long ban theh jingïarap haduh 50 klur tyngka ha ïewduh ban pynbha, pynitynnad bad pynsahnam ïa kane ka ïew ba la rim bha ha kane ka nongbah bad ha ka jylla hi baroh kawei.
Ka thong jongka sorkar MDA ka long ban pynlong ïa kane ka ïew kum ka jaka ban khring ïa ki nongwan jngohkai kiba nabar namar ha ka ka don ki khana tang bad ruh ki jaka lehniam kiba naduh mynshwa bad ïai neh haduh mynta.
Kane ka jingplie ïa une u maw Nongrim kan long ha ka jaka lehniam (Ritual Site), Khlieh ïew, ïewduh ha kapor 1 baje nohphai sngi.
Kane ka jingpynitynnad kan long nadong shadong, kata naduh kaba shna pynbna ïa ki basa, lynti ïaid ki nongleit ïew, nongshong ïew, ka jingsiang da ki tiles kiba bha, ka jingshna ïa ki nala um ba kan tuid bha ka um, ka jingshna pynbha ïa ka rukom ïaid ki pipe um, ki jaka leit bar ne ki paiñkhana kiba bha bad kumta ter ter.
ïa kane ka projek ka sorkar ka la pynïoh na ka NEC. Ki ban ïasynran lang ïa u Myntri Rangbah lashai ka sngi kin long baroh arngut ki Symbud Myntri Rangbah u bah Prestone Tynsong bad Ma Sniawbhalang Dhar bad kiwei kiwei ki myntri sorkar.
Hadien kane kan don ruhka jingïalang paidbah ha jaka pynïeng kali ne ka SMB Parking Lot kaba ha pyrshah ka Anjalee Cinema bad ha katei ka jingïalang u Myntri Rangbah un sam ïa ki cheque sha ki nongïoh jingmyntoi na ka Chief Minister Livelihood Grant (CM-ULG).