New Delhi, Jylliew 24: U Dr. Ricky Syngkon bad u Saleng Sangma, ki arngut ki MP jong ka Meghalaya kin bam smai ha ka sngi ba ar ryngkat bad kiwei pat ki MP ki bym pat la shim smai mynta ka sngi, kaba long ka sngi kaba sdang jong ka Dorbar Lok kaba thymmai.
Katkum ka jingpynbeit ka Lok Sabha hadien ka jingpynsmai ïa u Myntri Rangbah duh, u Narendra Modi bad ki Myntri ka sorkar jong u, kiwei pat kiba smai kin long katkum ki dak kiba sdang ka jylla jong ki. Mynta ka sngi la pynsmai palat 200 ngut ki MP. Ïa ka jingpynsmai yn pyndep ha ka sngi ba ar kynthup ïa ki MP ka jylla Meghalaya.
Hynnin ka sngi ha ka interview bad ka NDTV, u Dr. Ricky uba la shah jied napdeng ki katto katne ngut ki MP ba dang shah jied thymmai ban ïakren bad kane ka National Channel, u la ong ba ka kam kaba hakmat eh ka long ban burom ïa ka riti synshar jong ka ri. “Kane kadei awei na ki mat kiba kongsan eh ïa mynta”, la ong u MP ka Seng VPP.
Shuh shuh ha kane ka jingïakren u MP ka Shillong, u la ong ba kawei na ki mat ba un ïakhun ka long ban pyllait ïa ka ri India na ka jingbamsap, namar ba kane kadei ka mat kaba wanrah ïa baroh ki jingeh bad ki jingpang ha ka ri. “Nga kyrpad ïa baroh 543 ngut ki MP ba ngin ïatreilang ban ïaleh pyrshah ïa kane”, u la ong, da kaba ban ba dei ban klet noh ruh ïa ka jingïasngew Party ban wanrah ka jingïatreilang ban ïada ïa ki rit paid hapdeng ka ri India kaba ïar kaba don bun ki jaidbynriew, ki jait ktien, ki jait kolshor kiba ïapher kawei ïa kawei.
Ha kane ka jingïakren, u Dr. Ricky u la lah ruh ban pynpaw sha ka ri India ba kumno ka Seng VPP ka la leit sha ka elekshon da ka jingngeit kaba skhem ba ka lah ban jop ïa ka elekshon khlem ka bor pisa.
