Shillong, Rymphang 01: Ka Shillong Lajong kan ïakhun ïa ka jingïalehkai kaba saw sien lynter shabar nala ïing mynta ka sngi U Blei pyrshah ïa ka Real Kashmir ha ka por 2 baje mynsngi ha TRC Football Turf, Srinagar.
Hadien ka jingjop kaba shongkun ha ka derby pyrshah ïa ka Aizawl FC kaba dei kawei na ki kynhun na ka thaiñ shatei lammihngi ha ka jingïalehkai ba khatduh jong ka, ka Lajong kan kyrmen ban bteng ïa ka jingjop jong ki pyrshah ïa kane ka kynhun na Kashmir kiba haduh mynta ki don ïa ka rekod kaba bha ha ki jingïalehkai ba long hala ïing.
Ka Shillong Lajong ka don mynta ha ka kyrdan ba 6 ha ka miej da kaba kamai 16 poiñ naki 11 tylli ki jingïalehkai katba ka Real Kashmir ka bud nadien ha ka kyrdan ba hynñiew da kaba kamai 16 poiñ naki 11 sien ïalehkai bad dei tang ka jingïapher kol kaba pynïakhlad ïa kine ki arliang.
Lah ban kdew ba kane kan dei ka sien kaba saw ïa ka Lajong ban ïakhun shabar nala ïing bad kin khmihlynti ban pynnneh ïa kajuh ka rukom kumba la long ha ka jingïalehkai ba dang shen jong ki.
Kane kan long ka jingïalehkai kaba itynnad namar baroh ar liang mamla kin ïaleh katba lah ban khur pura ïa baroh lai point ban kiew shuh shuh kham shakhmat ha ka miej bad ban don ha ka thup ban ïaknieh ïa ka nam lahduh ha kane ka samoi jong ka I-League.
ïa kane ka jingïalehkai yn pyni live ruh lyngba ka Sony Sports Channel, SSEN mobile app bad ssen.co website.
