Shillong, Kyllalyngkot 16: Kum ka jingithuh ïa ka jingnoh synñiang bad ki mawjam ba ka la jam ha ka jingïalehkai phutbol ha kylleng ka pyrthei, ka Riiohlang Dhar ka la shah pynbna kum ka nongïoh ïa ka khusnam ‘U Kiang Nangbah Award ha kaba ïadei bad ka Sports mynta u snem 2026, la pynbna hynne ka sngi.
Kane ka khusnam ‘U Kiang Nangbah Award’ la sam da ka Sorkar Jylla Meghalaya man la u snem bad yn sa ai sha ka Riiohlang, kaba dei ka Assistant Referee ba la pawkhmat ha ka FIFA ha ka sngi Republic Day.
Ka Riiohlang Dhar ka la long ka nongpynïaid ha kiba bun ki lympung ïalehkai bar ri jong ka pyrthei ha kine ki snem. Ka la long tang ka nongpynïaid ïalehkai (match official) kaba ar jong ka ri India ha ka FIFA U-17 Women’s World Cup kaba la long ha ka ri Dominican Republic. Ha utei u snem la ïohi ruh ïa ka Riiohlang Dhar kaba dei ka pulit kynthei kaba dang shakri jong ka Meghalaya, ba la thung kum ka official ha ka lympung ïalehkai AFC U-17 Women’s Asian Cup ha Indonesia.
Ha u Jymmang 2025, ka la shah jied kum ka Female Assistant Referee of the Year AIFF na ka bynta u snem 2024-25. Nangta, ha u bnai Nohprah, ka la long kawei na ki 40 ngut ki briew kiba la shah pynkup burom na ka bynta ka jingnoh synñiang jong ki sha ka phutbol Meghalaya ha ka jingïalang sam khusnam jong ka MFA ban sdang ïa ka jingrakhe dap 50 snem jong ka synjuk.
Ha kaba kut jong u bnai Nohprah, la pynthikna ïa ka kyrteng jong ka ban rung ha ka thup jong ka FIFA Refereeing International na ka bynta u snem 2026.
