Mynta u bnai lah ban urlong ka jingkylliang shuki Myntri tang shu mynjur u Conrad Sangma

Shillong, Nailar, 03: Ka mat kylliang shuki Myntri ha ka Sorkar synrop ka lah ban urlong noh mynta u bnai Nailar tang shu ïoh ïa ka jingmynjur na u Myntri Rangbah ka Jylla u Conrad K Sangma hadien ba ladep ban ïa syllok lang bad ki nongïalam jong ki party.
Katkum ka tyllong khubor, ka ïathuh ba kane ka jingkylliang shuki Myntri ka la mih hadien ba bun ki MLA kiba donlang ha ka Sorkar synrop kynthup lang ïa ka National People’s Party kaba ïalam ïa ka Sorkar, ki la pynpaw ba ki dei hok ban ïoh bynta lem ïa ka shuki Myntri mar arsnem shiteng kumba la ïakren hashwa ban thaw ïa ka Sorkar MDA-II.
Kumba long mynta hi, na ki party kiba don ha ka Sorkar, dei tang ka BJP bad ka HSPDP kaba don mar arngut ki MLA. Na ka BJP ïa ka shuki Myntri mynta la bat da u MLA ka Pynthorumkhrah Constituency u Bah AL Hek bad u MLA ba khmih lynti ban ïoh bynta lang ïa ka shuki Myntri kumba long ha ka samoi ba ladep dei u Bah Sanbor Shullai u MLA ka Shillong South.
Na ka HSPDP, ïa ka shuki Myntri la bat mynta da u Bah Shakliar Warjri uba dei ruh u MLA jong ka Mawthadraishan Constituency katba u MLA ba la khmih lynti ban ïoh bat lem ïa ka shuki Myntri dei u MLA ka Mawshynrut Constituency u Bah Methodius Dkhar.
Dang shen haba ïakren bad u President ka HSPDP Bah KP Pangniang u la ïathuh ba ïa kane ka bynta un sa rah ban ïakren ha ka Executive Committee jong ka party ban shim lang ïa ka sur uba bun balang.
Kum ban shu pynkynmaw ba ha ka samoi ba ladep ka HSPDP ka la leh kumjuh kumba leh kiwei ki party da kaba ailad lem mar ar snem shiteng ïa ka shuki Myntri hapdeng ki arngut ki MLA jong ka.
La ïoh jingtip ruh ba wat na ka NPP kaba ïalam ïa ka Sorkar ha ka jylla ka thmu ban don ka jingkylliang shuki Myntri da kaba ailad lang ïa kiwei pat ki MLA jong ka party. Watla haduh mynta ym pat tip mano na kine kiba lah ban shah weng noh na ka shuki Myntri hynrei ka tyllong khubor ka ïathuh ba ki MLA ki ban ïoh rung thymmai ha ka kynhun Myntri un dei uwei na rilum Jaiñtia bad uwei pat na rilum Garo.
Dang shen u Symbud Myntri Rangbah Bah Sniawbhalang Dhar uba dei u nongïalam ka NPP khamtam na rilum Jaiñtia, u la kyntait ban kren eiei halor kane hynrei u shu ong ba ka shong ha ka mon laitluid jong u Myntri Rangbah ban leh ïa kane lada u sngew donkam.
Haba phai pat sha ka UDP kaba don haduh 12 ngut bad arngut ha ka shuki Myntri ki dak ki shin ki paw ba ka lah ban ym don satia kano kano ka jingkylliang shuki Myntri ha kane ka party. Watla katta ruh ym lah pat ban tip ïoh ka don ka jingkylla hadien.
Ka tyllong khubor ka ïathuh ruh ba lada ka jingïakren hapdeng u Myntri Rangbah bad ki nongïalam jong ki party, kane ka kam kan ym slem shuh bad la khmihlynti ba la kumno kumno kan sa urlong noh ha kine ki khyndiat sngi ban wan mynta u bnai.