Mynta sdang biang ka ïew ki nongrep ba shisien shibnai, kaba la tip kum ka ‘February edition’

Shillong, Rymphang 27: Da kaba pynshong nongrim halor ka jingjop jong ka jingpyrshang ïa ka ïew ki nongrep kaba la pynlong ha u bnai Kyllalyngkot, ka Sorkar Meghalaya kan pynlong biang ïa ka ïew ki nongrep ha ka 28 tarik u Rymphang ba la kyrshan da State-supported Monthly Farmers’ Market naduh ka por 9:30 mynstep haduh ka por 4:00 baje janmiet ha Parking Lot jong ka Directorate of Fisheries, kaba don mar pyrshah bad ka St. Edmund’s College, Risa Colony, Shillong.
Ïa kane la pynlong da ka 1917 iTEAMS hapoh ka tnad Agriculture and Farmers’ Welfare ba la kyrshan da ka Meghalaya Farmers’ (Empowerment) Commission (MFEC), kane ka jingthmu ka long ban ai ïa ki nongrep ïa ka rynsan kaba beit bad kaba shai na ki nongrep sha ki nongthied nongpet, ban pynthikna ïa ka jingpynïoh dor kaba kham bha bad ka jingïadei kaba khlaiñ ha ki ïew nongkyndong.
Ka February edition kan pynpaw ïa ki jingkhlain ban pynmih jong ka Meghalaya, khamtam eh ïa u soh strawberries, u soh marit bad kiwei kiwei de ki mar rep.Ki stall ba la pynkhreh kin mihkhmat ïa ki distrik bapher bapher, ban ailad ïa ki nongthied ban ïoh ïa ki mar kiba thymmai, kiba shngain ban bam bad kiba la ïoh beit na ki nongrep.
Da kaba ïalam da ka jingthmu jong u Myntri Rangbah u Conrad K. Sangma ban pynlong ïa ka rep ka riang kum ka jingim kaba neh ha ka ioh ka kot, ka Iew jong ki nongrep ba man u bnai ka dei ka jingthmu ba kongsan jong ka Jylla kaba pynleit jingmut ha ka jingpynkupbor ïa ki nongrep bad ban pynkhlain ïa ka ïoh ka kot ha ka thaiñ. Ka kyntiew ïa ka jingbuh dor kaba hok bad ka ailad ïa ki nongthied ban ioh ïa ki mar rep kiba dang shu kheit, kiba shngain ban bam, kiba biang ha ka dor ka mur.
Ka January edition, ka la pynpaw ïa ki jingthung kiba mih ha ka por tlang kum u Sohniamtra bad u Pathaw kiba die beit na ki nongrep sha ki nongthied.Ha kaba ki don 30 tylli ki stall bapher bapher, ha kane ka iew ka kynthup ïa ka farm-to-plate live kitchen ba la pynïaid da ki dkhot ba la shah ha ka Van Dhan Vikas Kendra (VDVK), kiba la pynmih palat T.20, 000 lak ha ka jingdie.
Nalor kata, ka jingïatreilang bad ka app jong ka khaii pateng kaba kloi kaba la tip kum ka SOMOI ka la ailad ïa ki nongrep bad ki nongseng kam seng jam ban pyniar ïa ka jingdie jong ki bad ban die ïa ki mar rep jong ka thaiñ da ka online ha kylleng ka nongbah Shillong.
La khot sngewbha ïa ki nongshong shnong jong ka nongbah Shillong bad ki jaka ba marjan ban wan jngoh ïa ka Farmers’ Market ha ka 28 tarik u Rymphang bad ban kyrshan ïa ki nongrep trai ri da kaba jied bad thied ïa ki mar rep ba la rep ha Meghalaya.