Mynta pat ai daw ba kwah da ki MBBS shaniah ha ka tnad ka koit ka khiah

Shillong, Nailur 02: Kaba sah mynta ka long sa ha ki bor bahalor ka Karuna Trust, kaba pynïaid ïa ka Mawlong PHC lyngba ka PPP Mode ka National Health Mission lem ka tnad ka koit ka khiah ka Sorkar Meghalaya, ban shim ïa ka rai la kan pynneh ne pynkynriah noh ïa ka Dr R Siangshai hadien lai snem ba ka la trei ïa ka kam kum ka Medical Officer Incharge katei ka PHC.
Kane ka la mih na ki bor pynïaid ka Elaka Mawlong ha ka jingïalam u Bah SK Laloo, Sirdar ryngkat ki nongïalam ka HNYF South East Khasi Hills District bad Mawlong Unit hadien ka jingïalang ïamir jingmut bad ki ophisar ka tnad ka koit ka khiah na East Khasi Hills District, ki doctor bad nongtrei katei ka PHC, BDO Shella Bholaganj C&RD Block, ki bor bahalor ka Karuna Trust lem kiwei pat ha ka 2 tarik u Nailur, 2024.
Katei ka jingïalang ka la long hadien ba ka la mih jingkynnoh na ka HNYF bad ki nongshong shnong ka thaiñ Mawlong khamtam kiba na ka dong Mawriang, myn ha ka 26 tarik u Nailar, 2024 kiba la kynnoh ba ka Dr R Siangshai ka leh baheh, kam shim khia ïa ka kam nalor ba kam ai jingïatreilang bad ki paidbah.
Hynrei haba kren sha ki lad pathai khubor hadien ka jingïalang, u Bah SK Laloo bad ki nongïalam ka seng ki la ong ba ki kwah noh ban ïoh doctor da kiba la pass kyrdan MBBS ha katei ka PHC bad ki ieh pat ha ka jingibit ka Karuna Trust ban weng noh lane pynneh ia ka Dr R Siangshai.
Da kaba pynpaw ba baroh ki jingkynnoh kiba la mih na ki jingbymia- sngewthuh jingmut la dep ïakren lut ha ka jingïalang mynta ka sngi, u Bah SK Laloo u la ong, “Kum ka Elaka ka dang kwah ba ka Karuna Trust kan dang pynïaid ïa ka PHC watla ka la don ka jingtyrwa ban pynïaid noh da ka tnad ka koit ka khiah ka. Ngim don eiei ban ong halor ka Dr Siangshai namar baroh la dep ïakren ha ka jingïalang bad ka shong ha ka Trust ban shim rai”.
“Ngi khmih lynti ka jingïatreilang bad ka PHC nangne bad kiei kei kiba la dep jia hap ban ïa mab bad klet noh”, la ong u Bah SK Laloo uba buh jingkyrpad ïa ka Karuna Trust ba ïa ki nongtrei kiba dei na ki thaiñ Mawlong lada don kaei kaei kaba ki bakla hi donkam ban ïakren bad ki bor shnong.
Na ka liang u Bah Banjop Khongwir, Nongai-ktien ka HNYF South East Khasi Hills District u la ong ba ka seng ka ïoh ka jingujor na ki paidbah bad kumta ka jingïakren ka long na ka bynta ka jingmyntoi jong ki paidbah da ka jingïatreilang.
Da kaba pynpaw ka jingsngewsih ba na ka khubor kaba la pynmih ha ki khyndiat sngi ba la dep ki don ki briew kiba kynthoh pynïasyriem ïa ka jingjia ha Kolkata, u Bah Banjop u la kyntu ïa ki paidbah ban kiar na kaba kynthoh klumar namar ka ktah ïa ka jingsngew.
“Ki lah ban don ki jingbakla na ka liang ki paidbah ne ka doctor ruh kumjuh hynrei hap ban pynbeit da ka jingïatreilang”, u la ong da kaba bynrap ba halor ka jingshim pisa bai umphniang Ambulance hap peit ka jingdonkam. U la ong ba ban teh kyndon eh ha ka koit ka khiah ïa ki paidbah ruh ka ktah bad ban shim kabu ïa ki nongtrei ruh kam long kaba ïahap.
U la ong ba ka seng kan ïakren bad u MLA ka Shella, u Bah Balajiedkupar Synrem ban pynbiang ïa ka jingshakri ha ka ban sumar ïa ki nongshong shnong ha ki PHC bad ki Sub-Centre bapher bapher. U la ong ba ka seng kan ïakren ruh bad ka Myntri ba dei khmih ia ka tnad ka Koit ka khiah, ka Dr Ampareen Lyngdoh ha ki khyndiat sngi ban wan hadien ka jingïakren bad u MLA.
Na ka liang ka Dr EL Kharmutee, District Maternal and Child Health Officer, ka la ong ba kam long kaba suk ïa ki Doctor ban leit sumar pang sha ki ïing. Halor ka jingshim pisa da ki Ambulance hi ka dei ïa kiba la rangbah ym ïa ki longkmie armet bad ki khyllung ba hapoh shi snem.
“Ka Dr Siangshai ka dei kaba trei shitom bad lai snem ka la trei ha kane ka PHC bad ym ju don ki jingujor lait tang ba duna ki dawai. Ha ki hynniew snem la don 7 ngut ki doktor kiba la thung hynrei lait tang ka Dr Siangshai kaba neh lai snem, kiwei kiwei kim ju neh namar tang katto katne por ki la iehnoh ïa ka kam bad ngam tip balei ka jia kumne “, ka la ong bad bynrap ba ïa ki jingpharep dei ban da bishar bha bad donkam ka jingïakren bad ïamir jingmut.
Ka la pyntip ba ki nongshong shnong bad ki bor shnong ki dang kwah ba ka Karuna Trust kan dang bteng ha kaba pynïaid ïa kane ka PHC.