Shillong, Jylliew 20 : Ka Central Election Committee (CEC) United Democratic Party (UDP) ka lah ban pynbna mynta ka sngi Ba-ar ïa ki katto katne ngut ki kyrtong kiban aireng ha kane ka elekshon MLA kaban long ha u 2023.
Haba pyntip ïa kane, u President jong ka UDP East Khasi Hills, Bah Titos W Chyne u la ong ruh ba ha katei ka jingïalang jong ka CEC, kin sa aiti katto katne tylli ki kyrteng na ki constituency kiba hap ha ka jingpeit jong u ha East Khasi Hills.
Nalorkata, u Bah Titos u ong ruh ba ha ki constituency kiba don arngut ki kyrtong, na ka liang ka party hi ka bynshet ha ki circle ïa ka kyrteng jong no ki kwah ban phah.
Haba jubab halor ka jingmih arngut ki kyrtong na Mawsynram, kata hapdeng u Bah O Suin ba dei nongïalam ka party na katei ka thaiñ bad ruh halor ka jingkwah u Bah HM Shangpliang, MLA ba mynta ban ïakhun na katei ka party, u Bah Titos u la ong, “Lada ki phah arngut ki kyrtong ka shong ha ka Central Election Committee ban jied uwei na ki hynrei lada ki phah tang kawei ka kyrteng tang ïa kata hi ngin mynjur.”
U Bah Titos u la ïathuh ruh ba tad haduh mynta hi na Mawsynram ki dang ïoh pdiang tang ka kyrteng jong u Bah Suin. Tangba, u ong pat ba ïa kaei kaba kim pat ïoh pdiang da ka lynti kaba dei kim pat lah satia ban ong ei ei.
Ha kajuh ka por, u ong ruh ba ki don haduh 8 ne 9 ngut ei ei ki MLA na ki party bapher bapher kiba tyrwa ba ki kwah ban ïakhun noh na ka UDP ha ka elekshon ban wan.
