Shillong, Risaw 15 : Ka Laitkor SC bad ka Nongrim Hills SC kin kynduh ban tynjuh bor mynta ka step sngi Balang ha ka lympung ïalehkai ba nyngkong jong ka Shillong Premier League 2024 ha ka por 11:50 baje mynstep ha madan SSA Stadium First Ground, Polo.
Ha kane ka lympung ïalehkai kaba heh tam jong ka OC Blue SPL ba pynlong da ka Shillong Sports Association, kan sakhi ïa ki 10 tylli ki klob mynta ka samoi kynthup ïa ka lahduh ha ka samoi ba la dep ka Mawlai SC, nangta ka Rangdajied United FC, ka Shillong Lajong FC, Langsning FC, Ryntih FC, Sawmer SC, Nongthymmai SC, Nangkiew Irat SC bad kumjuh ka Laitkor bad Nongrim Hills.
Ha kane kajuh ka sngi, ka Sawmer pat kan ïakhun pyrshah ïa ka Nangkiew Irat ha ka por 2:45 baje mynsngi.
Lah ban kdew hangne ba ka Sawmer ka la wan ha ka kyrdan kaba hynriew na ki phra tylli ki kynhun ha ka lympung SPL ha u snem 2023, katba ka Nangkiew Irat ka la don ha ka kyrdan kaba khatduh. Hynrei ka SSA pat ka la rai ban pynduh noh ïa ka jingpynhiar kyrdan ha ka samoi ba la dep kaba plie lad pat ïa ka Nangkiew Irat bad kumjuh ïa ka Nongthymmai kaba don ha ka kyrdan kaba 7.
Kane ka lympung kadei kawei na ki rynsan ïalehkai phutbol kaba heh tam bad kaba shongthit tam ha ka jylla.
Ban shu pynkynmaw biang, na ka liang u President ka Shillong Sports Association, Bah Banteidor Lyngdoh u la pynbna ba ka khusnam song pisa na ka bynta kane ka lympung kan kiew sha ka 6lak tyngka na ka bynta ka lahduh bad ka kynhun kaba wan ba ar pat kan khur ïa ka song pisa kaba 3lak tyngka. Shuh shuh la ong ruh ba baroh ki klob kin ïoh ruh ïa ka bhah na kaba die tiket.
