Nongpoh, Nailur 23: Kawei naki lympung ïalehkai phutbol ba heh tam ha Ri-Bhoi kan sdang ban plie pyrda noh ïaka haka 24 tarik (Sngi Saitjaiñ) Nailur kaba la tip kum ka 1st Damanbait Lamare Knock Out Football Tournament bala pynlong da ka Umroi Block National People’s Youth Front naduh ka por 1 baje noh phai sngi ha madan ïalehkai jong ka shnong Umroi Nongrah.
U Bah Pynhun Rynghang u nongai ktien jong katei ka lympung ua la ïathuh ba katei ka lympung kan dei kawei naki lympung ïalehkai ba heh ha Ri-Bhoi ha kaba ka kynhun lahduh kan ioh ban rong ïaka song pisa kaba haduh 3 lakh bad ka kynhun ba rem haka jingïakhun phainal kan ioh ban khur haduh 1 lakh nalor kiwei kiwei ki khusnam shimet.
Na ka liang ka NPYF Umroi Block ka khot bad wer ïaki paidbah ban wan sakhi ha katei ka sngi khnang ba katei ka lympung kan long kaba shongshit bad ïaid beit ïaid ryntih.
