Mynta ka sngi yn sdang ka Durand Cup 2025

Shillong, Naitung 22 : Ka Durand Cup – 2025 kaba dei ka lympung ïalehkai phutbol kaba la pynkhihwin bad pynshongshit hi puk ïa ki paidbah ieit phutbol ka Meghalaya, kan sdang mynta ka sngi, ka 23tarik Naitung ha Kolkata.
Ha kane ka jingïakhun sdang, ka kynhun ïalehkai Indian Super League jong ka East Bengal kan ïakhun pyrshah ïa ka South United FCha ka por 4:00 baje janmiet ha Vivekananda Yuba Bharati Krirangan,Kolkata
Kumban shu kdew hangne, ka Durand Cup kadei ka lympung ïalehkai phutbol kaba la rim tam ha dewbah Asia bad kane ka kynti kan dei ka snem kaba 134 ban pynlong ïa ka. Ïa kane ka lympung yn pynlong ha ki san tylli ki nongbah jong ka Ri naduh ka 23tarik Naitung haduh ka 23tarik u Nailar.
Ki san tylli ki nongbah kiba ïoh ban pynlong ïa kane ka lympung ki kynthup ïa ka
Kolkata, Shillong, Jamshedpur, Kokrajhar, bad ka nongbah ba ïoh ïa ka kabu ksiar ban pynlong ha ka sien kaba nyngkong, ka Imphal.
Ryngkat ka East Bengal, ki don sa san tylli kiwei pat ki klob jong ka Indian Super League kiba shim bynta ha kane ka lympung – ka Mohun Bagan Super Giant, Mohammedan SC, NorthEast United FC, Jamshedpur FC, bad ka Punjab FC.
Ïa kine ki 24 tylli ki kynhun la phiah pat ha ki 6 group bad ka lahduh naman la kawei kawei ka group kynthup lang ïa ki ar tylli ki kynhun kiba leh bha kiba wan ha ka kyrdan kaba ar, kin rung pat sha ka kylla kaba bud jong ka knockout stage.
Haba phai pat sha ka lahduh jong ka samoi ba la dep, ka NorthEast United FC kane ka kynhun kaba dei na ka thain shatei lam-mihngi jong ka Ri kan hap ban ïakhun pyrshah ia ka Foreign Services Team ha ka 02tarik Nailar ha madan JN Stadium, Polo Shillong na ka Group E.
Kine harum ki dei ki kynhun kiba la shah pynkap katkum ki Group bad ki jaka ïalehkai.
Group A (Kolkata): East Bengal FC, South United FC, Indian Air Force FT, Namdhari FC
Group B (Kolkata): Mohun Bagan Super Giant, Mohammedan SC, Diamond Harbour FC, BSF FT
Group C (Jamshedpur): Jamshedpur FC, Indian Army FT, 1 Ladakh FC, Foreign Services Team
Group D (Kokrajhar): Karbi Anglong Morning Star FC, Punjab FC, ITBP FT, Bodoland FC
Group E (Shillong): NorthEast United FC, Rangdajied United FC, Shillong Lajong FC, Foreign Services Team
Group F (Imphal): TRAU FC, NEROCA FC, Indian Navy FT, Real Kashmir FC.
Ha Shillong pat ka jingïakhun kan long ha ka 26tarik mynta u bnai ha kaba ka Shillong Lajong kan hap ban ïakhun pyrshah ïa ka Foreign Services Team ha ka por 4:00 baje janmiet ha madan JN Stadium, Polo Shillong.
Ka jingïakhun kaba ar pat kan long ha ka 29tarik Naitung ha ka por 7:00 baje janmiet hapdeng ka Shillong Lajong bad ka Rangdajied United FC kaban dei ruh ka jingïakhun kaban itynnad bha.
Ka jingïakhun kaba bud pat kan long ha ka 02tarik Nailar, 2025 hapdeng ka NorthEast United FC pyrshah ïa ka Foreign Services Team ha ka por 7:00 baje janmiet.
Nangta ha ka 05tarik Nailar, ka Rangdajied United FC kan hap ban iakhun pyrshah ia ka Foreign Services Team ha ka por 7:00 baje janmiet.
Ha ka 08tarik pat, ka Shillong Lajong FC kan hap ban ïakhun pyrshah ïa ka NorthEast United FC ha ka por 7:00 baje janmiet. Kane ruh kan dei kawei pat ka jingïalehkai kaban khring bun bha ki nongpeit kai kumba long ha ka samoi ba la dep haduh ba la dap smam ki nongpeitkai.
Bad ka jingïakhun kaba khatduh ha ka Group E kan long hapdeng ka NorthEast United FC pyrshah ïa ka Rangdajied United FC ha ka 11tarik mynta u bnai ha ka por 7:00 baje janmiet ha madan, Jawaharlal Nehru Stadium, Shillong.