Mynta ka sngi yn sdang ïa ka lympung U-20 Fourth Division 2024
Yn ïalehkai nyngkong ka Thynroit SC bad ka Mawreng SC
Shillong, Jylliew 26: Ka Shillong Sports Association ka sa ïoh ban sdang noh ïa ka lympung lehkai ‘U-20 Fourth Division Football League Cum Knock Out Tournament 2024’ mynta ka Sngi Palei ha SSA Stadium, Polo ha kaba ka Thynroit SC bad ka Mawreng SC kin plie pyrda ïa ka jingïalehkai ba nyngkong jong mynta ka samoi ha ka por 4 baje nohphaisngi.
Kaba kham shongshit ka long ba mynta ka kynti ki don haduh 30 tylli ki kynhun ki ban ïakhun, ka sien ba nyngkong ba ïasoh bun tylli ki kynhun ban ïalehkai ha ka Fourth Division haba nujor ïa ki samoi ba ladep, ha kaba la phiah mar san kynhun sha hynriew tylli ki thup (Group-A haduh F).
Watla ki kynhun ba shimbynta ki khambun mynta u snem hynrei ki jingïalehkai ki kham duna ban ïa u snem 2023 ha ka por ba phiah tang saw tylli ki Group kiba kynthup haduh hynñiew tylli ki kynhun lait noh kawei ka Group kaba don phra tylli ki kynhun.
Katkum kane ka format mynta u snem, ki ar kynhun ba wan hakhmat na man la ki Group ryngkat ba saw tylli ki kynhun kyrdan ba lai ba la jied katkum ka jingïoh kamai point kin ïohrung sha ka pre-quarterfinal.
Mynta u snem, ka SSA ka la ailad ïa ki kynhun ban soi 5 ngut ki player kiba la palat ïa ka 20 snem, watla tang 3 ngut la shah ban pynmih ha ka thup Starting XI. Ka daw ba shalyndet ka long ban ailad ïa ki player kiba la kot palat ïa ka snem ba la buh ki bym shym la ïoh ban ïasoh sha kiwei pat ki klob ban bteng ïalehkai.
Kumba ka long, ka rukom pynïaid ïa ki jingïalehkai ka dang ïaisah kumjuh, ha kaba kawei ka jingïalehkai kan long 70 minit bad ki kynhun ki lah ban bujli player san ngut. Ban kham pynkloi ïa ka lympung ki jingïalehkai yn pynlong ruh ha First bad Third Ground ha Polo.
Ha ka sngi sdang ïa kane ka lympung kan don tang kawei ka jingïakhun, kata hapdeng ka Thynroit SC bad ka Mawreng SC ki kynhun na ka Group-A, por 4 baje nohphai sngi, katba ha ka sngi ba bud (28 tarik) ki don ar tylli ki jingïakhun na ka Group-B bad C.
Lashai ka sngi, ka jingïakhun na ka Group-C kan long hapdeng ka Madan S&CC pyrshah ïa ka Golflink SC ha ka por 1:45 baje mynsngi, nangta ka Group-B, ka Mawlyngad SC pyrshah ïa ka Mawñianglah SC ha ka por 4 baje nohphaisngi ha SSA Ground, Polo.