Mynta ka sngi yn rai ki 32 hajar ngut ki nongthep vote ka Gambegre ïa ka lawei ki 6 ngut

Shillong, Naiwieng 12: Ka jingïalap elekshon shiteng samoi ka ban long ha Gambegre constituency ka la kut noh ha ka janmiet jong ka sngi ba-ar ha kaba ki kyrtong jong ka Congress, NPP bad Trinamool Congress ki la ïakhun ban ïoh khroh ïa ki nongthep vote.
Ïa ka elekshon shiteng samoi hapoh ka Gambegre constituency kan long ha ka 13 tarik mynta u bnai bad ka jingñiew ïa ki vote pat kan long ha ka 23 tarik mynta u bnai.
Ki la don haduh 6 ngut ki kyrtong ki ban ïakhun ïa kane ka elekshon kaba kynthup ïa ka tnga jong u Myntri Rangbah ka jylla u Conrad Sangma ka Mehtab Chandee Sangma (NPP), u Jingjang M. Marak (Congress), Sadhiarani M. Sangma (Trinamool Congress), Bernard N. Marak (BJP) bad 2 ngut ki kyrtong shimet kiba kynthup ïa u Sengkrabirth Marak bad Jerry A. Sangma.
Lah ban ong ba kane ka jingpynlong ïa ka elekshon shiteng samoi ka long na ka daw ba u MLA barim ka Gambegre constituency u Saleng A Sangma u la iehnoh ïa ka kam hadien ba u la shah jied kum u MP sha ka Lok Sabha napoh Tura.
Lah ruh ban ong ba ki don haduh 32,254 ki nongthep vote ha kane ka constituency kaba kynthup ïa ki 16,331 ngut kiba dei kiba dei ki shynrang bad kumba 15,923 ngut kidei ki nongthep vote kiba dei ki kynthei.
Katkum ka jingïathuh jong ki heh ophisar ka tnat elekshon la ong ba ki don haduh 3 tylli ki kyrdan nongthep vote kata ki la don 993 ngut ki nongthep vote kiba dei samla, 64 ngut ki tymmen ki kro bad kumba 100 ngut kidei kiba duna ha ki dkhot met.
Na ki 51 tylli ki polling station, ki la don haduh 31 tylli kiba la ithuh ba ki don hapdeng ki jingma.
Na ka liang jong u Myntri Rangbah ka jylla u Conrad Sangma ha ryngkat lang bad ki myntri ka sorkar jylla bad ki MLA ki la leit ban ïalap ha kane ka elekshon khnang ban pynthikna ba ka Mehtab Chandee Sangma kan ïoh ka jingjop ha kane ka elekshon.
La kynnoh ruh ba na ka liang ka NPP ka la buh bun ki jingkular bad kumjuh ruh ka jingleit ïalap elekshon sha manla ki thliew ïing.