Mynta ka sngi yn ïakynduh u CM ïa ki seng bhalang na Ri-lum Garo ha Tura halor ka Roster

Tura, Jylliew 02: U Myntri Rangbah ka jylla u Conrad K. Sangma mynta ka sngi un ïakynduh bad ki seng bhalang kiba na Ri-lum Garo ha sor Tura na bynta ban ïakren halor ka roster system bad ka reservation policy, bad ïa kane ka jingïalang yn pynlong ha Tura Circuit House.
Kat kum ki jingtip ba la ïoh la ïathuh ba kiba bun ki seng bhalang ba kynhtup ïa ka Garo Student Unioun (GSU), Mothers Union of Tura, ACHIK, Garoland State Movement Committee, AHAM, All India Garo Union, Federation for A’chik Freedom, A’chik Organisation for Social Welfare, All A’chik Youth Federation, ADE, A’chik Youth Welfare Organisation, Niksamso Garo Community Organisation, FKJGP (Tura), Tura Garo Senior Citizens’ Forum and New Tura Development Forum ki dei kiba la khih lynti ban wan shim bynta sha kane ka jingïalang.
Ka Myntri ki kam ai ka sorkar jylla ka Kong Ampareen Lyngdoh, haba kren sha ki lad pathai khubor ka la ïathuh ba hadien ba u Myntri Rangbah ka jylla u la dep ban ïakynduh ïa ki seng bad ki kynhun kiba don ha ki bynta ka Ri-lum Khasi mynta ka sngi pat un sa kynduh bad ki seng bhalang na Ri-lum Garo.
Lah ban kdew hangne ba na ka liang ka sorkar jylla ka la khot ïa ki seng bhalang ba kynthup ïa ki seng bhalang na rilum Khasi bad Garo ruh ha ka 31 tarik Jymmang hynrei na ka liang ki seng bhalang na ri-lum Khasi ki la kyntait ban leit shim bynta sha kane ka jingïalang ha kaba ki dawa pat ba ka sorkar ka dei ban khot shuwa ïa u Bah Ardent ban ïakren uba la shong shah thngan naduh ka 23 tarik bad ruh na ka liang ki seng bhalang na rilum Garo ki la kyntait ban wan shim bynta sha Shillong bad ki dawa ba ka sorkar ka dei ban pynlong ïa kane ka jingïalang ha Tura.