Mynta ka sngi yn ïa thir, ki nongmihkhmat, nongïalam niam bad riew shemphang halor ka ishu Casino

Nongpoh, Nailur 25 : Kumba kawei naki mat ba khluid bha haka jylla mynta ka dei halor ka jingthmu jong ka sorkar ban wanrah ïaka ktem khalai ne ka Casino haka jylla ïa kaba la thmu ban buh ha Ri-Bhoi District, ka kynhun jong ki Rangbah Shnong bad Sengbhalang hapoh ka lama jong ka Joint Action Committee Against Casinos mynta ka sngi sngi nyngkong kan pynlong da ka prokram ba kyrpang ban ïathir ïatai sani ha kaba ïadei bad ka jingpyrshah ïaka ktem khalai hadien ba ka sorkar kala wanrah ïaka Meghalaya Regulation of Gaming Act 2021.
U nongai ktien jong ka JACAC u Samla Ferdinald Kharkamni u la pyntip ba katei ka jing ïathir jingmut halor ka jingpyrshah ïaka khalai ha Ri-Bhoi yn wan ruh ban shim bynta da ki riew shemphang naduh ki MLA, MDC ka Ri-Bhoi, ki nongïalam ñiam, ki Principal jong ki skul, ki Seng Samla bad kiwei kiwei.
Kum ban shu pynpaw ba ïaka Casino ki kynhun bapher bapher haka jylla naduh ki sengbhalang, ki kynhun ñiam, ki Rangbah Shnong bad ki paidbah ba bun ba lang kila pynpaw ba kim kwah ba katei ka ktem khalai kan treikam lane yn plie ha Ri-Bhoi District kaba lah ban wanrah shibun ki kam sniew bad ki kam awria bapher bapher ha kaba dang ha kine ki khyndiat sngi kila don ruh ki sengbhalang kiba la thmu ban leit hiar sha ka thaiñ Khanapara wat ban pynpra ïaka khyrdop ban pynpaw ka jingpyrshah.
Katei ka jingïathir ïatai yn sdang naduh ka por 10 baje mynstep haka 26 tarik Nailur ha ïing Dorbar Sajer bad ha katei ka sngi ki riew pawkhmat kin sa pynsngew ruh ha kaba ïadei bad ka jingthmu jong ka sorkar ban pynlong ïaka Ri-bhoi District kum ka ktem Khalai bad ki jingktah kiba mih na katei ka Casino.