Shillong, Naiwieng 2: U Symbud Myntri Rangbah ka jylla u Bah Prestone Tynsong mynta ka sngi un sa ïa kynduh ïa ki nongïalam jong ki san tylli ki seng bhalang kiba kiba la mih sha surok ban dawa na ka sorkar ban pyntreikam ïa ki 9 tylli ki mat ha ka Save Hynñiewtrep Mission.
U Bah Prestone u la ïai ban biang ba ka jynkhang Secretariat ka plie beit ban ïatai bad kino kino ki kynhun ïa ki mat ki jura kiba ktah ïa ka jylla.
“Lashai ka sngi ngan ïa kynduh bad ki nongïalam ki san seng bad nga ban biang ba ka jynkhang Secretariat ka ïai plie ïa baroh ban wan ïatai bad ka sorkar”, u la ong.
“Ngin sa ïatai ïa kino kino ki mat bad nga kyrmen ba ka jingïatai kan long kaba don jingmut” u la bynrap bad u la ong ba haba ïadei bad ka ILP un sa lah ban kren tad ynda la wai ka jingïalang bad ki san seng mynta ka sngi.
Haba ïadei bad ka jingpynkheiñ jong kine ki san seng ïa ka kyndon 144 CrPC, u Bah Prestone u la ong, “Nga kyntu ïa baroh ba kin burom ïa ka aiñ bad haba kren halor ka aiñ ai ba ki tnat ba dei pyntreikam ïa kata ka aiñ kin leh la ka bynta namar ym don mano mano ba lah ban shim ïa ka aiñ katba mon bad ba ka shonsguk shohngsaiñ kan ym thut’
Halor ka jingkylli la katei ka jingïakhih bad ka ilekshon kaban sa wan u Bah Prestone u la ong, “Ngam don eiei ba ong ïa kane hynrei ai ki paidbah kin bishar”.
Kum ban shu pynkynmaw ba ki san tylli ki seng ba kynthup ïa ka HYC, HANM, JSM, ENJC bad CoRP ki la mih paidbah ha ka sngi Ba-ar ban tur sha Secretariat wat la ka don ka jingmana na ka DC namar ka jingpynjari ïa ka 144 CrPC ban dawa ba ka sorkar ban pynurlong ïa ki 9 tylli ki mat ba ki dawa hapoh ka thup jong ka Save Hynñiewtrep Mission.
Kine ki 9 tylli ki mat kaba ki la buh ki long ka jingpyntreikam noh ïa ka ILP, ka jingithuh ïa ka ktien Khasi, jingpynkynriah ïa kiba shong ba sah ha them Metor, ban pynbeit thymmai ïa ka Reservation Policy, ban pynbeit biang ïa ka MoU-1, ban tohkit CBI halor ki kam bamsap, ban tohkit CBI ba shah siat ïap u Bah Cherish, ban thungkam mardor ïa ki kam kiba thylli ha jylla, ban weng mardor ïa ka aiñ khalai.
