Shillong, Naiwieng 20 : U Nongïalam ka United Democratic Party (UDP) ba dei ruh u Myntri ha ka sorkar jylla, Bah Kyrmen Shylla ha ka sngi Balang u la ong ba ki paidbah ka jylla ki shaniah ïa ka UDP bad dei na kane ka daw ba ha ka elekshon ba la dep ki la pynjop haduh 12 ngut ki MLA bad bun ngut ki MDC la ka long ha rilum Khasi bad kumjuh ruh ha rilum Jaiñtia.
Haba kren bad ki lad pathai khubor, u Bah Kyrmen Shylla u la ong ruh ba ki khmih lynti ba wat kane ka elekshon MDC kaban long shen ki paidbah ka jylla kin ai ka jingkyrshan kaba pura ïa ka party kumba ki la kyrshan ha ki elekshon ba la dep.
“Ngi ju don ïa ki jingïalang na ka por sha ka por ha ka party bad mynta ka party ka la pynkhreh shaid shaid na bynta ka elekshon. Mynta ngi dang ap ïa ka por ban pynbna ïa ki kyrtong ha baroh ki distrik bad ha kiba bun ki jaka ki kyrtong ki wan ban kyrpad ïangi ban ai tiket na bynta kane ka elekshon,” u la ïathuh.
Nalorkata, u ong ruh ba ha ka elekshon MDC ba la dep ki paidbah ka rilum Khasi bad Jaintia ki la pynjop bun ngut bha ki MDC bad kumta mynta ka kynti ruh ki khmih lynti ba kin ïai bteng ban ai ka jingkyrshan. .
“Mynta ka kynti ruh ngi don ka jingkyrmen ba ngin jop bun ki kyrtong bad ngin sa pynshisha ba ki paidbah ki don ryngkat,” la bynrap biang u Bah Kyrmen.
Shuh shuh u la ong ruh ba ka elekshon MP ka la ai jingsneng bad pynkyndit bynriew ïa ki bad dei na kane ka daw ba mynta ki don ka jingkyrmen ba ki paidbah kin phai khmat biang sha ka UDP.
Haba jubab pat halor ka jingkylli, u Bah Kyrmen u ong ba ka jingmih ki party thymmai kam don kano kano ka jingktah namar ki ruh ki don ka hok ban ïakhun elekshon.
“Tangba, ngi don hangne ym dei ban ia kob bad kino kino hynrei ban trei ban pyni sha ki paidbah ba ngi thrang ban shakri na bynta jong ki. Ka jingdon jongngi hangne kam dei tang ban shu ia kynnoh hynrei ka long beit tang ban shakri ïa ki paidbah ka jylla.”
Hadien kane u la iathuh ba ki sngew kmen ba ki paidbah ki la pynjop haduh 12 ngut ki MLA bad ki dang don ka jingkyrmen ba ha u snem 2028 kin sa lah ban jop kham bun shuh shuh.
