Shillong, Jymmang 31 : Haba ïohi ha kine ki sngi lyngba ki lad pathai khubor khamtam ha ki social media ba la sdang mih ki jingïakynnoh bad kynthoh mar kylliang hapdeng ki kynhun ne party kiba ïa synrop lang ha ka sorkar Meghalaya Democratic Alliance (MDA) u MLA ka Mawlai Constituency u bah P.T Sawkmie da ka mynsiem kaba sngewkhia u kyntu ïa ki nongïalam kiba la ih bha ha ka saiñ pyrthei ban ïa burom mar kylliang bad tyngkan bha ka ktien ka thylliej namar u la ong mano ban tip mynta ïalam ka NPP ïa ka sorkar MDA hynrei ïoh ha u 2023 ïalam sa ka UDP bad hap ban ïatrei lang hi bad ka NPP haba kumta ym ïalehrain ban ïatyngkhuh markhmat.
Haba ïakren bad u Mawphor u la ong “ Kum ki nongïalam kiba la ih bha ha ka saiñ pyrthei ngi dei ban don ka jingkitkhlieh bad ban ïa burom mar kylliang khamtam ha ka ktien ka thylliej namar kam long kaba itynnad satia ban ïohi ba lynter kine ki san snem la ïatrei lang hynrei mynta tang namar ba la jan ka election la sdang ban ïathad madan iwei ia iwei. Nga tharai baroh ki party kiba ïa synrop lang ha kane ka sorkar MDA ki don kajuh ka jingkit khlieh namar khlem pep haba shim ïakano kano ka rai kan don shwa ka jingïamir jingmut hapoh ka MDA bad hadien ba la ïa mynjur sa ïa shim rai lang”.
Kumta u la ong “ Lada kynthoh ïa ka NPP ne ïa ka UDP ne ïano ïano ruh kiba ïadon lang ha ka sorkar ka mut ki kynthoh da lade ïa lade namar ki ïadon bynta lang hi haba shim ïa kano kano ka rai ruh”.
Nalor kata u bah Sawkmie u la ong “ Ha ka saiñ pyrthei jongka riti synshar paidbah kam i tynnad ban ïathad ne ïa kynnoh, kynthoh ïano ïano ruh da ki kyntien ba khlem akor, kum kata ka jaidbyriew kaba la tip ba ka ri ïa ka akor bad ka burom kumta kan jin da la bha ba ngin ïa tyngkan ïa ka ktien ka thylliej ban ym ïa kren katba lap ba shem da ki ktien kiba ym sngew tynnad wat ha ka imlang ka sahlang namar na ka jingkren jong ki riew rangbah ka lah ban ïalam bakla bad hikai sniew wat ïa ki khyllung khynnah ruh. Namar ha kane ka juk ba mynta wat ki khyllung khynnah ruh ki la tip lut ban mushlia ha ki mobile phone bad kumta kan bha hi ban ïa sumar bha ïa ka ktien ka thylliej bad kiar na kaba pynmong ïa kiwei da ki ktien khlem akor” pynkut u bah Sawkmie.
