Mynsngi mynshai tuh ki mynder Bangladeshi na ki thaiñ khappud India-Bangladesh

Mawkyrwat, ‘Nailar 01: Ki mynderi na ka Bangladesh pylleiñ pylleiñ mynsngi mynshai ki la rong tuh ïa ki jingdon jingem jong ki paitbah nongshong shnong ka ri India ha ki shnong kiba don ha shilynter ka khappud India-Bangladesh ha South West Khasi Hills District.
Ha kaba ïadei bad kane ka jingjia, ka pyni shai ïa ka jingdkoh ka jingtreikam jong ki shipai ïada khappud ne ki Border Security Force (BSF) ban ïada ïa u pud u sam jong ka ri ha kaba ki mynder Bangladeshi ki ïoh ban ïaid laitluid.
Katkum ka tyllong khubor ba la ïoh lum, la ïathuh ba kine ki shnong kiba ki mynder Bangladeshi ki wan tuh pylleiñ pylleiñ mynsngi mynshai ki kynthup ïa ka Borsora, Cheragoan, Rongdu, Bagli, Ka lagoan, Rajaju, Lakma, Sawlymbor, Nongjri bad Nonghyllam.
Na ki video ba la ringdur da ki paitbah nongshong shnong na kitei ki thaiñ, la ïohi ba ki mynder Bangladeshi ki la rong ha ki byrni ïa ki jingdon jingem jong ki paitbah katei ka thaiñ, bad la ong ruh ba kitei ki mar ba ki mynder ki kit u dei u dewiong, ha kaba ki la wan kit na India bad leit rah sha Bangladesh khlem kano kano ka jingwit.