Shillong, Jylliew 06 : Ka khlaw Lyngdoh kaba don ha Nongkseh markhap bad ka Lummawbah, ha ki snem ba mynshwa ka ju dei ka jaka sah jong u ‘Labasa, ha kito ki snem ba ka khlaw ka dang rben bha, ong u General Secretary ka Raid Sawkur Nongkseh, Bah Myrank Thangkhiew haba kren ha ka jingïalang thung dieng ba la pynlong da ka NPP Mylliem bad NPYF ha kane ka sngi Nyngkong.
Utei u rangbah u la ïathuh ruh ba kum ka Raid ki thrang bha ban ker bha sawdong katei ka khlaw kaba ki longshwa ki ju pynlong ruh kum ka jaka duwai. “Ngi kwah ban pynlong ïa ka kum ka jaka ba ki rangbah kiba la noh ka rta kin ïoh ban wan ïaid kai ne wan kilan met,” la bynrap biang u Bah Myrank.
Na ka lïang u Kongsan, Bah Bajop Pyngrope MDC ka NPP na Rambrai pat u la ong ha ka jingshisha u kwah ban ïohi ba ka jingthung dieng kam dei eh ban long tang shisien ha ka 365 sngi hynrei katba dang biang ka por dei ban thung beit.
Shuh shuh u ong ruh ba bun ki ïing ki la hap ban pyndonkam da ki kor AC (air conditioner) ban pynsyaid ne pynkhriat ïa ki kamra ïing namar ka jingkylla ka mariang. “Ha ki khyndiat snem mynshwa ha Shillong ngim donkam AC ne pakha hynrei mynta pat jan baroh ki la hap ban pyndonkam lut. Ka daw hi kadei namar ka jingshah pynkhyllem lut ki dieng ki siej,” u la ong.
Ha kane ka sngi la ïoh ruh ïa ka jingkren na u President ka NPYF, Bah Kitborlang Nongrem, nangta na u Bah Botamin Thangkhiew Rangbah Kur, nalor kiwei pat ki nongïalam jong ka NPYF.
Ki skul kiba shim bynta ha katei ka jingthung dieng ki don bun tylli bha kynthup naduh ka skul Shonroy Basan Secondary, St.Gabriel Higher Secondary, Sanshnong High School, Thomas German Jones Memorial bad ruh ka Kyrdon Morning School.
Lah ban kdew hangne ruh ba tad haduh mynta katei ka khlaw kaba hap ha ka jingpeit jong ka Raid Sawkur Nongkseh, ki dieng ki siej ki dang bun bha nalor ba ki la heh bad ïaw bha.
