Mynsaw uwei u samla na Bataw da kaba shah pom da ka wait na ryndang ha shnong Pynurkba bad shah pynjulor ki kali nong Bataw

Khliehriat nailur 8: Uwei u samla uba na ka shnong Bataw, u ba tip kyrteng kum u Sincerity Lyngdoh, 26 snem kyrta u la mynsaw jur na ka daw ka jingshah pom da ka wait na ryndang bad ar tylli ki kali kiba na shnong Bataw ki la shah pynjulor bad kane ka la jia ha shnong Pynurkba mynta ka janmiet hi.
Ki tyllong khubor ki ïathuh ba utei u samla uba shah pynmynsaw u dei uba dang wan na Shillong bad dang wan thep form na ka bynta ka kam BSF bad ynda u la poi ha shnong Pynurkba u la shah pom da ka wait ha ki briew kiba ym pat lah ban tip mynta, ki ar tylli ki kali pat kiba don u registration number ML-11-3835 ba dei ka kali kamai bad kawei pat ka kali shimet ba don u number ML-04-8163 ki la shah pynjulor ha ki briew kiba ym pat lah ban tip, ym lah ban tip ba kane ka jing ïa mynsaw bad ka jingshah pynjulor ki kali haleh ka lah ban dei lehse na ka daw ka jingïakynad bad ïa kajia pud hapdeng ka shnong Bataw bad ka shnong Pynurkba.
Ki thymmei khubor ki ïathuh shuh shuh ba ïa u samla Sincerity Lyngdoh la pynkit noh mar mar sha Bataw PHC ban ïoh ïa ka jingsumar ba kyrkieh.
Na ka liang ki bor pulit tang shu ïoh jingtip halor kane ka jingjia mar mar ki la leit sha shnong Pynurkba bad sha Bataw ban tehlakam ïa ka jingïakynad hapdeng kitei ki ar shnong.
Kum ban shu bynrap, Ki nongshong shnong jong ka shnong Bataw hapoh ka jingïalam u Waheh Shnong, u bah Deihok Sumer mynta ka sngi ki la ïa mih paidbah bad kynthei bad shynrang bad tur sha ka jaka ba don ka jingïakajia pud bad ka shnong Pynurkba bad ki la pynsangeh shisyndon ïa ka jingthmu ban kit maw ki briew kiba na shnong Pynurkba kiba la thep maw hapoh ka trok bad kam ba ka dei ka jaka kaba dang hap hapoh u pud u sam jong ka shnong Bataw.
Hadien katto katne por la wan poi sa ki bor pulit kiba na Ladrymbai Outpost bad u Waheh Shnong Pynurkba, u bah Syrdeplang Ryngkhlem lem bad ki nongshong shnong ka Pynurkba, ha ka jingïakynduh lang jong ki nongshong shnong kiba na baroh ar tylli ki shnong ka la jan mih ka huri hura bad ka la don ka jingïa pynphai nia mar kylliang jong ki nongshong shnong ne ka thma ktien kaba jur bha bad dei da ka jingdon ki pulit la lah pat ban tehlakam bad pyn jai jai ïa ka jingïa bitar ki nongshong shnong kiba na baroh ar tylli ki shnong.
Na ka liang ki bor pulit haduh mynta ki dang pynlong ks jinhpeitngor ban wanrah ïa ka shong suk shong saiñ ha kitei ki shnong ha Bataw bad ha Pynurkba bad ki shnong ba marjan.