Mynsaw u rangbah ba kum siat hi dalade da ka pistol jong uwei u pulit ha Syntu Ksiar WJHD

Khliehriat, Nailar 11: Ha kawei ka jingjia kaba la jia hynnin ka sngi, ka 10 tarik u nailar, ha Syntu Ksiar, West Jaiñtia Hills District, uwei u rangbah briew uba la tip kyrteng kum u Wanda-O Najiar u la mynsaw na ki bynta ka khlieh na ka daw ba u la kum siat hi dalade da ka suloi jong uwei u pulit SI, ïa kane ka jingjia ki pulit jong ka Jowai Police Station ki la ioh jingtip na ka kong Lutimon Najiar, kaba dei ka para jong u Wanda-O Najiar.
La ong ba u bah Wanda-O Najiar lem bad u pulit S.I, u Wewanroy Challam lem bad ki paralok hynnin ka sngi ki la leit bamkhana sha Syntu Ksiar bad kane ka jingjia ka la jia ha ka por 4:30 janmiet bad hadien ba la kum siat da ka pistol u SI Wewanroy Challam mar mar u la pynkit ïa u bah Najiar sha hospital MCH, Panaliar bad na ka daw ba jur ka jingmynsaw la pynkit noh ïa u sha Woodland Hospital, Sabahmuswang bad ruh mar mar la pynkit sha Woodland Hospital, Shillong.
Halor katei ka jingjia ïa u S.I Wewanroy Challam, uba dei u 2nd O/C jong ka Nartiang Police Station la khot hajir ha Jowai Police Station bad la phah ban leh ïa ka medical examination, ha ka jingtohkit u SI Challam u la iathuh ba myn ha ka 10 tarik u nailar lem bad u bah Wanda-O Najiar bad u bah Manda-oo Dkhar ki la ïa leit bamkhana sha Syntu Ksiar bad hadien ba ki la ïa shoh khawiang u Najiar u la shim ïa ka pistol (service pistol) jong u SI Challam bad sdang ban lehkai ïa kata ka pistol bad dei na ka daw ka jingbuaid u la kum pyllait ïa ki kuli na ka pistol bad ka la wanrah ïa ka jingmynsaw ïa u Najiar hi na ki bynta ka khlieh.
U S/I Challam, u la iathuh shuh shuh ba kam shym la don satia kano kano ka jingiamai jingiania hapdeng jong ki kaba la wanrah ïa kane ka jingmynsaw hynrei ka dei beit namar ka jingbakla.
Kumjuh ruh u bah Manda-oo Dkhar u la iathuh ba ka dei tang ka jingbakla hi u bah Najiar bad ha katei ka por ba jia u bah Manda-oo Dkhar u dang iaidkai ban peit ïa ka mariang bad ynda u wan sha ka jaka ba ki don u la lap ïa katei ka jingjia ha kaba u bah Najiar u la thiah ha ka jinglynkien ka snam
Halor kane ka jingjia ki bor ka aiñ ki la ai da ka Show Cause Notice ïa u SI Wewanroy Challam bad ka jingtohkit ka dang ïaid shakhmat.