Shillong, ïaïong, 28: Uwei u nongniah trok ïa uba la tip kyrteng kum u Bah John Richard Syiemlieh u la mynsaw na ki bynta jong ka khlieh hadien ba u la shah kawang da ki maw ha ki nongap jong ka khyrdop khrong khajna kaba don ha Manai Ladmeri, kaba hap ha Eastern West Khasi Hills District. Kane ka la jia ha ka 6 tarik mynta u bnai Ïaiong ha ka por 7:00 baje janmiet.
Katkum ka ejahar ba la mudui sha ki Pulit jong ka Mairang Police Station, la ong ba u Bah John Syiemlieh katba u dang wan kit shyiap na ka thaiñ Markasa da ka Trok kaba don ïa u nombar ML-10-9638 bad ïa ka khajna kit shyiap ula dep siew ha ka khyrdop kaba don ha Markasa. Hynrei ynda la poi ha Ladmeri, ki nongkhrong khajna ki la dawa beit ba u dei ban siew 400 tyngka bad kyntait ruh ban ïakren wat hadien ba u ladep pynshai ba u ladep siew ha ka khyrdop kaba don ha Markasa.
Ha ka jingïakren bad ki lad pathai khubor ha ka sngi Palei, u Bah John Syiemlieh u la ïathuh ba u la tyrwa T. 200 ban pyllait ïa ka trok, hynrei kine ki nongkhrong khajna ha Ladmeri ki la kyntait ban pdiang ïa ka pisa bad ki la kawang da ki maw ïa u na khlieh bad ha ka jingbym tip- briew shuh, ka kali ka la leit tur sha ka kynroh bad lait thaw na ka jingnoh sha riat.
Ha kaba ïadei bad kane, ka Meghalaya Commercial Truck Owners and Drivers Association (MCTODA) ka la dawa ïa ka Khasi Hills Autonomous District Council (KHADC) ba ka dei ban leh eiei halor kane ka jingjia bad dawa ruh ïa ki bor jong ka aiñ ban kem mardor ïa kiba donkti khnang ba ki nongniah trok kin ym shah pynthud satia ha ki nongkhrong khajna kiba ju ap ha ki khyrdop kiba la pynieng ha shilynter jong ka surokbah.
U Chief Adviser jong ka MCTODA u Bah Joannes JTL Lamare, ula ong ba ka long kaei kaei kaba sngewsih ban ïohi kum kine ki jingjia wat hadien ba ka Joint Secretary jong ka Sorkar Jylla dang shen ka la pynmih ïa ka hukum ba ym dei satia ban pynieng ïa ki khyrdop khrong khajna da ki Hima bad ki District Council ha shilynter ka surokbah hynrei haduh mynta kine ki khyrdop ki dang ïai don bad ki long ruh ka jingpynwit ïa ka ïaid ka ieng jong ki trok.
“Lada ki bor ka aiñ kim leh eiei, ngim banse ban leit ujor sa sha ki bor ba kham halor khnang ki nongniah trok kin lait na ka jingshah pyndik ha surok,” u la ong.
