Shillong, K’Lyngkot 03: Uwei u samla u la mynsaw jur hadien ba u la shah dung da ka khanshi ha ka 1 tarik mynta u bnai na ki bynta ka pyllew ka khmat ka mon kaba la jia ha ka por kumba 9:45 baje mynmiet katba u dang don ha Ghumti Parking Lot kaba don ha Cantonment Area, Shillong.
Une u samla uba la mynsaw u dei uba la tip kyrteng kum u Deva Kharkongor, 23 snem ka rta bad mynta u dang don hapdeng ka jingshah sumar ha NEIGRIHMS Hospital, Shillong.
Ki bahaing hasem jong une u samla ki la ujor da ka ejahar sha ki Pulit jong ka Jhalupara Police Outpost halor kane ka jingjia da kaba jer kyrteng ïa uwei u briew uba kyrteng u Saidin Ali uba dei u khun jong ka Aisha Khatun ba ju khot sin da ka Pahari.
Halor kane ka jingjia, ki Pulit ki la kem noh ïa une uba la shah suba bad ka jingtohkit ka dang ïaid shakhmat.
