Pynursla, Nailur 29: Ha kawei ka jingjia ba sngew sangsot iwei i khunlung ba dang shisnem tam eiei i la mynsaw jur na ka jingaityngkhuh kali kaba la jia ha Pynursla ha ka shiteng sngi jong ka sngi Palei katba ki dang shong ha ka kali ban leit sha ïew Pynursla ban leit shim dawai.
La ong ba kawei ka trok kaba don ïa u registration no MLO5T 3174 ka la leit tynrah ïa ka Bolero kaba shong ine i khynnah bad kaba don ïa u registration no ML04B 3484 kaba dei ruh ka kali jong ka NEIMA Pynursla.
La ïathuh ba ki don kumba 5 ngut kiba shong ha kane ka kali bad tang shu jia kane ka jingjia la pynkit noh sha Pynursla CHC ba kin ïoh ka jingsumar hynrei na ka daw ka jingjur ka jingmynsaw la pynkit noh marmar sha Civil Hospital Shillong ïa ine i khunlung ban ïoh ïa ka jingsumar kaba paka.
Haba pyrshang ban twad jingmut na kiba sakhi ïa kane ka jingjia la ong ba ka jingjia ïatyngkhuh namar ka jingpynher sted palat kane ka trok haduh ba kam lah teh lakam shuh.
Katkum ka jingïathuh la ong ba ine i khunlung i dei iba la sumar noh da ka North East India Mission Association(NEIMA) Pynursla namar ka jingkhlad noh i kmie jong i dang kumba lai bnai eiei mynshuwa.
Haba kylli na ki Pulit ki la ïathuh ba ka jingïatyngkhuh ka lah ban dei na ka jingpynher sted kaba palat pud baroh ar liang hynrei na ka liang jong ki ki ong kan dang kloi than namar ka jingtohkit ka dang ïaid shakhmat.
Haba ïadei bad kane ka jingjia na ka liang ka FKJGP Riwar Mihngi Circle ka la pynrem jur ruh ïa ki trok kit maw khamtam eh namar ka jingpynher sted kaba palat pud kaba buh jingma pat ïa ki nongleit nongwan.
“Ngi kum ka seng ngi sakhi ïa ka jingpynher stad ba palat pud jong ki kali kit maw ban beh ïa ka laiñ jong ki bad lyngba kane ka jingjia ka dei ban long ka khubor ïa baroh ba ym dei ban pynher sted kali ïoh poi sha kino kino ki jingjia ba sngwesih” ong ka kyrwoh na u E Khonglam Information secretary ka seng.
