Mynsaw jur 2 ngut ba hap kali hajan kawei ka jingkieng ha Saitsnad, Mawlangwir

Mawkyrwat, ‘Nailur 19: Kawei ka jingjia ba la jia mynta ka janmiet jong ka 19 tarik u ‘Nailur, 2022 ha kaba kawei ka sumo ka la hap ha kawei ka jaka ba long riat hajan ka jingkieng ïaid kali ha kawei na ki jaka ba khot Saitsnad, Mawlangwir, South West Khasi Hills District.
Katkum ka jingïoh lum jingtip na ki bor pulit la ong ba kawei ka sumo kaba don ïa u number ML 05 J 6025 ba la ñiah da u Kitboklang Lartang, 28 snem kaba mih na Mawkyrwat bad thmu ban leit phai sha Nongkenbah ka la hap noh ha kawei ka jaka ba long riat. Shuh shuh la ong ba kane ka jingjia ka la jia mynta ka janmiet jong ka 19 tarik u ‘Nailur, 2022 ha ka por kumba 05:30 ei ei janmiet.
Hadien kane ka jingjia, la ong ba ïa baroh kiba la mynsaw la pynkit noh sha CHC Mawkyrwat namar ha kane ka jingjia 11 ngut ki briew ki la mynsaw, katba 2 ngut na ki pat ki la mynsaw jur kynthup ïa u nongñiah ïa ka kali ha kaba ïa kine la kit noh mar mar sha Shillong khnang ba kin ïoh ka jingsumar kaba khambha”, ong ka tyllong khubor na ki Pulit.
Halor kane ka jingjia na ka liang ki pulit ki la dep ban register case bad ka jingtohkit ka dang ïaid shakhmat.