Nongpoh, Naitung 11: 3 ngut ki briew kila mynsaw jur mynta ka sngi hadien ka jingtyngkhuh kali kaba jur ha Mawdiangum Nongpoh hadien ba kawei ka trok kala leit ban tynrah ïa 2 tylli ki kali ha u surok bah National Highway-6 haki kynta ba ther u lapbah.
Katei ka jingjia kala jia mynta ka janmiet haka por 4 baje eiei ha kaba kawei ka trok kaba don ïa u number ML 11 8124 kaba la pynher sted bha kaba dang wan na Guwahati ban leit sha Shillong kala leit ban tynrah beit ïa kawei ka Bolero Pick Up kaba don ïa u number ML 10 C 0886, bad kawei ka trok kaba dang ïeng harud surok kaba don ïa u number UP 22 AT 1640 haduh ba 3 ngut ki briew kila mynsaw jur bad la pynkit noh sha Civil Hospital Nongpoh naka bynta ka jingsumar ba kyrkieh.
Kitei kiba mynsaw la tip kyrteng kum u Bantei Kynjing (22) u ba dei u nongñiah jong ka trok kaba la leit ban tynrah, u Ononto Majhong (21) u nongñiah jong ka Bolero Pickup bad u Ravi Kumar, u nongbud jong ka trok kaba ïeng bad naka liang ki pulit jong ka Nongpoh ki dang pynlong ka jingtohkit ban lap ïa daw tynrai jong ka jingjia.
