Khliehriat jymmang 4:Lai ngut ki briew ki la mynsaw jur ha ka jinghap ka kali sumo ha kawei ka riat kaba jrong 30-40 phut ha Deiñchynrum East Jaiñtia Hills District, ïa kitei kiba mynsaw la pynkit noh mar mar sha NEIGRIM hospital Shillong katba ïa kiwei pat la pynkit ha Khliehriat CHC.
Ki tyllong khubor ki iathuh ba ka jinghap jong katei ka sumo ka dei na ka daw ka jingshoh samthiah u nongñiah namar ba u la ñiah kali baroh shi miet ha ka jing iaid lynti kaba jngai bad kane ka la jia mynta ka sngi ha ka por 6 baje mynstep.
Katei ka kali sumo kamai ka dei kaba don ïa u registration number ML-05-L 9402 kaba la mih na Aizawl hynnin ka sngi 6 baje jan miet kaba thmu ban leit sha Shillong kaba kit 10 ngut ki pasenger kaba la iaid lyngba na ka surok National Highway East Jaiñtia Hills District bad ynda poi ha Deiñchynrum ka la leit hap noh sha riat.
