Nongpoh, Jylliew 22: Hadien ka jinglap ïa bun ki nongpynkheiñ aiñ ha surok bah naduh kiba ïeng beaiñ khamtam ki trok ba ju wanrah ïa ki jingjia aksiden bapher bapher, ka jingdih kyiad ha ka por ba ñiah kali, ki kam khaii drok bad ban tehlakam ïa ki kam sniew, ki pulit jong ka Nongpoh Traffic Branch hynnin ka miet ki la mih sha surok bah ban talasi naphang ïa ki kali kiba kiew sha Shillong bad kumjuh ruh kiba hiar sha Guwahati.
Kum ban shu kdew ba ka jingjia aksiden ki la jur bha ha kine ki khyndiat sngi bad ki khyndiat bnai ha ka thaiñ Ri-Bhoi, kaba la wanrah ruh shibun ki jingjia ba sngewsih bad kane ka la pynlong ïa ka tnad pulit ka Ri-Bhoi ban peitngor, namar ki don ruh ki jingjia kiba dei tang na kadaw ka jingthurmur, ka jingbym bud ryntih ïa ki kyndon aiñ ñiah kali bad kumta ter ter.
Ban pynthikna ba ki paidbah ki dei ban burom ïa ki aiñ ñiah kali, ki pulit ka Nongpoh Traffic Branch naduh ki ophisar ki la mih sha surok ban pynlong ïa ka jingtalasi namar kum ka tnad pulit ka don ka jingangnud ban wanrah ïa ka imlang ka sahlang kaba lait naki kam sniew, ki jingpynkheiñ aiñ bad ki jingjia ba sngewsih, namar tang na kadaw ka jingthurmur haba ñiah kali ka ktah ruh ïa shibun ki paidbah kiba leit ba wan ha shilynter jong u surok bah.
Ha katei jingtalasi na ka liang ka tnad pulit kal pynap ruh da ki kuna ïa ki briew kiba pynkheiñ aiñ ha surok bah bad pynlong ruh ka jing peit pyrman ha shilynter jong u surok ha ki jak aba hap hapoh ka jingpeit jong ka Nongpoh Traffic ban pynthikna ba ki trok kiba ju ieng beaiñ harud surok khamtam ha ka por mynmiet ka buh jingma ïa ki paidbah ba leit ba wan ba kim dei ban ïeng kulmar hynrei ban dang bha ha ki jaka ba kylluid.
Na ka liang ka tnad Pulit ka la kyrpad ruh ïa ki paidbah ban burom ïa ki aiñ ñiah kali, ban kiar na ka jingdih buaid khamtam ha ka por ba ñiah kali, ban deng ïa ki helmet haba ñiah ïa ki thuk thuk, bad ban nym ieng beaiñ ha ki jaka bym dei khamtam ha ka por miet ba jur ki jingjia aksiden.
