Mynmiet call u CM nga shu kohnguh beit, ong u Deputy Speaker hadien ba la dep hiar shuki

Shillong, Nailur 08 : U MLA ba la rangbah tam hapoh Ïing Dorbar Thawain ka Jylla u Timothy D Shira uba mihkhmat ïa ka Resubelpara constituency ha ka sngi Nyngkong u la hiar shuki noh kum u Deputy Speaker jong ka Ïing Dorbar Thawain ka Jylla katkum ka jingbthah na ki bor bahalor jong ka party.
Haba kren bad ki lad pathai khubor hadien ba la dep hiar shuki, u Timothy u la ïathuh ba u la ïoh pdiang ïa ka call na u Myntri Rangbah ka Jylla Conrad K Sangma ha ka miet sngi U Blei ha kaba la bthah ïa u ba un hiar noh na ka shuki Deputy Speaker. U la ong ruh ba kum u briew uba burom ïa ka rai jong ka party u la pyndep ïa kane ka jingbthah khlem da buh kano kano ka jingkylli.decision.
“Ngam don ei ei ban kynthoh halor kane namar nga la dep ban hiar shuki katkum ka jingbthah jong ka party high command. Kumta ka shong ha ka jingstad jong u Myntri Rangbah shaei un phah ïanga,” la bynrap shuh shuh u Timothy.
Da kaba pynpaw ba u Conrad u dei u Myntri Rangbah ba u sngewtynnad eh, une u MLA ba la rangbah bha u la ong ba um lah satia ban pyneh ne buh jingkylli ha ka por ba la phah ïa u ban hiar shuki noh.
Haduh mynta u la pynpaw ba um pat tip shaei yn phah pat ïa u. Halor ka jingkylli u ong ba khatduh hi ka shong ha ka rai jong u Myntri Rangbah hato ïoh u pynrung ïa u ha ka thup Myntri lane ïoh u phah shawei pat.