Nongpoh, Jylliew 18: Ki nongïalam ka seng United Democratic Party, Umsning Circle haka jingïalang kaba la long ha Sumer Umbang mynta ka sngi haka jingdonlang ki nongïalam jong ki Unit bapher bapher ka Umsning Circle, kila shim ïaka rai ban mynjur ïa u Bah Donkupar Sumer kum u kyrtong naka party UDP sha ka elekshon 2023 ban jied ïaki nongmihkhmat sha ka iing Dorbar thaw aiñ ka jylla.
Kitei ki nongïalam ka Umsning Circle kila mynjur ruh ban pan ticket ïa u Bah Donkupar Sumer kum u kyrtong ka party UDP na Umsning da kaba ïa rah kti bad ïa katei ka rai yn sa phah pat sha ki nongïalam ka Central Bopy ban rai halor ka ticket.
Kum ban shu pynpaw ba u Bah Donkupar Sumer u dei ruh u ba la ïakhun teng ïaka elekshon MLA ha ki snem bala leit bad ruh u ba la long kum u MDC barim ka Umsning Constituency, bad dei ha kane ka kynti ba mynta naka liang utei u rangbah u la rai ban ïakhun biang ïaka elekshon naka party UDP kaba un sa ap satang ka jingpynbna ïaka ticket hadien ba ki nongkyrshan kila dep ban mynjur ïa u kum u kyrtong.
Haba kren sha ki lad pathai khubor naka liang u Bah Donkupar Sumer u la pynpaw ba u dap da ka jingsngewkmen kaba khraw ba ki nongkyrshan jong u ki dang don ka jingshaniah kaba skhem ha u, ban ailad biang sa shisien ba un ïakhun ha kane ka elekshon MLA ban wan da kaba kynthoh ruh ïa u MLA ba mynta u Bah Jason Sawkmie Mawlong ba u khlem leh eiei ha kine ki 4 snem, bad un nym leh eiei hi ruh namar ba u la dep ban thied ïaki paidbah da ka dor ha u 2018.
U la ong ruh ba kane ka dei ka kynti kaba ki paidbah ki dei ban sngewthuh shai ban jied ïaki nongmihkhmat kiba lah ban trei ïaka kam namar lada ngi bakla biang ban jied ïaki nongmihkhmat kan long ka jingtim ïaki paidbah bad mad jingeh biang kumba ngi mad mynta ha kaba ki paidbah kim lah wat tang ban kynduh ïa u MLA hynrei hap ban kynduh biang ïakiwei pat ki briew kiba u phah pateng.
Kum uwei naki nongïalam u ba ju don ka jingangnud ban trei bad shakri naka bynta ki paidbah ha Umsning Constituency, naka liang u Bah Donkupar Sumer u la kop ruh ba kane ka dei ka kynti jong ka UDP ban thaw sorkar, ban jop donburom ha kylleng ki jaka naka bynta ki jingkylla, bad ka thong kaba hakhmat eh jong u, ha kane ka kynti kaba mynta ka long ban wanrah ïaka Umsning Civil Sub Division bad kumjuh ruh ka Civil Hospital kiba long ki mat ba kongsan eh ba ki paidbah ki donkam naka bynta ban pynsuk ïaka jingshakri haka liang ki ophis sorkar bad kumjuh ruh ka koit ka khiah.
