Shillong, Jymmang 02: Ka Sorkar Pdeng hynne ka sngi kala mynjur ban pyllait noh ïa ki College ka Jylla Meghalaya kiba pynïaid da ki riewshimet ne kiba bei bad iarap pisa da ka Sorkar na ka Common University Entrance Test (CUET).
Ïa kane la pyntip da u Myntri Rangbah ka Jylla Conrad Kongkal Sangma hadien ka jingïalang bad u Myntri ka Tnad Pule Puthi ka Ri u Dharmendra Pradhan ha New Delhi.
“Nga la ïakren halor ka CUET kaba long ka jingeh ïa kiba bun ki College jong ngi kiba iasoi bad ka North Eastern Hill Univeristy (NEHU)” ula ong.
U Conrad ula ong ba u Myntri ka Tnad Pule Puthi ula sngap ïa ki jingeh jong ki College bad ki samla pule ka Jylla bad kular ban pyllait noh ïa ka CUET na ka bynta ki College ba pynïaid da ki riew shimet ne ba bei bad iarap pisa da ka Sorkar Jylla.
“Ka Sorkar Pdeng kala mynjur ba kin don katto katne ki bynta kiba kan pyrshang ban pyllait ïa ki katto katne ki College jong ngi ki bym dei satia kiba bei pisa da ka Sorkar Pdeng hynrei kiba bei bad iarap pisa da ka Sorkar Jylla. Kine ki College kin ym donkam shuh ban ialeh ïa ka eksam” ula pyntip.
Haba pyntip ba ka Sorkar Pdeng kan sa phah da ka jingthoh halor kane ka kam ha kine ki shisngi arsngi ban wan, u Myntri Rangbah ka Jylla ula ong “Ngi kyrmen skhem ba bun na ki samla pule jong ngi kiba dang pule lane don jing thmu ban pule ha ki College ba pynïaid da ki riew shimet lane ba iasoh bad iarap pisa da ka Sorkar Jylla kin nym don kam shuh ban ialeh ïa kane ka eksam (CUET)”.
“Nga ai khublei ïa u Myntri uba la sngap ïa ki jingeh jong ngi bad ngin ap mynta ïa ka jingthoh ka ban wan na ki (Sorkar Pdeng) ban sa ïoh pyntip sha baroh” ula bynrap.
