Mynjur ka Sorkar Pdeng ban phah tohkit CBI ïa ka jingshah siat ïap ki san ngut ha Mukroh

Shillong, Naiwieng, 24: Ka Sorkar Pdeng ka la mynjur ïa ka jingkyrpad ka Sorkar Meghalaya ban aiti ïa ka jingtohkit ha ka Central Bureau of Investigation (CBI) ha kaba ïadei bad ka jingshah siat ïap jong ki san ngut ki briew ha ka shnong Mukroh, West Jaiñtia Hills ha ka step sngi Baar mynta ka taiew ha ki Pulit ka Jylla Assam.
U Myntri Rangbah ka Jylla u Conrad K. Sangma ryngkat bad ki Myntri ki la ïakynduh ïa u Myntri ka tnat Kam Pohing u Amit Shah ha New Delhi bad pynsngew ha u ïa ka jingjia ha ka shnong Mukroh bad kyrpad ruh ban aiti ïa ka jingtohkit ha ka CBI.
Ïa u Myntri Rangbah la synran lang da u Symbud Myntri Rangbah u Bah Prestone Tynsong, u Myntri ka tnat Kam Pohing u Bah Lahkmen Rymbui, u Myntri ka tnat PHE u Bah Renikton Tongkhar bad u Myntri ka tnat C&RD u Bah Hamletson Dohling.
Ka Sorkar Assam ka la phah ïa kajuh ka jingkyrpad ïa ka Sorkar Pdeng ban aiti ïa ka jingtohkit ha ka CBI halor kane ka jingjia.
Ha ka jingïakren bad ki lad pathai khubor hadien ka jingïakynduh ïa u Amit Shah, u Conrad Sangma u la ïathuh ba u Myntri Rangbah ka Jylla Assam u la pyntip, ‘ba baroh ka jingjia kaba la mih ka jingsiat kuli ba jia ryngkhat bad ka don ka jingpyndonka palat pud ïa ka bor da ki Pulit na ka jylla Assam.”
“Ngi la kyrpad ïa ka Sorkar India ban thung ïa ka jingtohkit jong ka Sorkar Pdeng halor kane ka jingjia, lane lyngba ka CIA ne ka NIA lane kino kino ki Agency khnang ba ka jingshisha kan paw pyrthei. Kaba kham kongsan, kito kiba donkti ki dei ban ngat ha ka jingshah pynshitom halor kane ka kam bymman. U Myntri ka tnat Kam Pohing u la ai ka jingkular ïa ngi ba un sa thung ïa ka jingtohkit da ka Cenral Agency bad ka hukum yn sa pynmih ha kano kano ka por,” u la ong.
U Sangma u la ïathuh ba u la pynsngew hakhmat u Amit Shah ba ka daw tynrai kaba pynmih ïa kane ka jingjia ka dei na ka jingïakajia pud kaba la sah pongding la slem bha hapdeng ka jylla Assam bad ka Meghalaya.
“Kiba bun ki jingjia, ki la lam sha ka jingïapynibor kaba poi sha u pud ban wanrah ïa ki jingjia ba sngewsih kumba la jia ha Mukroh. Namarkata, yn sa shimkhia ban pynthikna ba ki jingïakajia pud yn sa pynkut noh shen,’ ong u Myntri Rangbah bad bynrap, ‘na ka jingjia ha ka shnong Mukroh, ka jingïakren pynbeit pud bad ka Assam ka la ïatakhuh mawsiang bad kin sa do ki jaka ha kaba yn sa donkam ïa ka jingshahniah bad ïa ka jingtuklar jong ka Sorkar India ban pynkut noh syndon.”
U la ong ong shuh shuh ba ha ka jingïakren la ïathir ïatai halor ka jingshngaiñ jong ki paidbah kiba sah ha khappud khamtam ha ki jaka ba don ka jingïakynad. U la ïathuh ba ka Sorkar Jylla ka la kyntu ïa ka Sorkar Pdeng ban pynsdang noh mardor ïa ka jingïakren hapdeng ka Sorkar Meghalaya bad Assam khnang ba kine ki jingjia kim dei shuh ban dang jia hadien habud.
U la pynsngew hakhmat u Amit Shah ban ai jingkyrshan ha kaba ïadei bad ka jingshalan ïa ki marbam kam dei ban shah pynthud hynrei ban wanrah ïa ka jingïatreilang hapdeng kine ki ar tylli ki jylla.
“Ngi la ïakren ruh halor ka jingdawa ban pynrung ïa ka Ktien Khasi bad Garo ha ka Khyrnit Baphra, ka jingpyntreikam ïa ka Inner Line Permit bad ban ailad ïa ka Sorkar Jylla ban pyntreikam noh ïa ka MRSSA,” la ong u Conrad.