Shillong, Naitung, 13: Ka Sorkar Jylla ha ka sngi Balang ka la mynjur ïa ka Meghalaya Public Communication Policy, 2024.
Ha ka jingïakren bad ki lad pathai khubor hadien ba la wai ka jingïalang kynhun Myntri u la ong, “Kane ka polisi ka dei kaba la sahteng la slem bha namar ka jingbym lah ban pyntreikam da ka DIPR. Lyngba kane ka polisi yn sa pynbeit ryntih ha baroh kawei ka jylla ha kaba ka Sorkar kan buh ïa ki nongai ktien na ki tnat treikam bapher bapher ka Sorkar ki ban ai ïa ki jingtip sha ki lad pathai khubor.”
Ha kane ka sngi, ka kynhun Myntri ka la mynjur ruh ïa ka jingpynbeit thymmai ïa ki kyndon jong ka Meghalaya Day Award.
“Nyngkong eh, ngi la rai ban kyntiew ïa ka song pisa jong ka khusnam na ka T.1 lak sha ka T.2 lak,” la ïathuh u Myntri Rangbah.
U la ïathuh ruh ba la rai ba ki nongioh khusnam kin hap ban aplai online ha kaba kim donkam shuh ban phah ïa ki jingtip ba bniah sha ka tnat ba dei peit.
Shuh shuh ka kynhun Myntri ka la rai ban pynbeit thymmai ïa ka Meghalaya Right to Public Service Rules khnang ban pynthikna ba ka jingpdiang ïa ka aplikeshon dei ban pyndep hapoh 7 sngi. “Ngi la mynjur ban pynbeit thymmai ïa ka Rule 7 jong ka Meghalaya Right to Public Service Rules,” ong u Myntri Rangbah.
