Mynjur ka sorkar ïa ka Meghalaya Pharmacists Service Rules bad Meghalaya Mental Health Care Rules

Shillong, Nohprah 09: Ka kynhun myntri jong ka sorkar jylla ka la mynjur ïa ki artylli ki jingsdang ki lad jingsumar ne ki 2 tylli ki healthcare initiatives – ka Meghalaya Pharmacists Service Rules bad ka Meghalaya Mental Health Care Rules kaba la thmu ban pynkhlaiñ ïa ki kam ai jingsumar ha ka jylla.
“Ïa ki kyndon la shna na ka bynta ka Meghalaya Pharmacists Service Rules kaban dei ïa ka kam thungkam bad ki kam shakri ki pharmacist ha ka jylla. Ngim don ïa ki service rules na ka bynta ki Pharmacist ka jylla kumta kito ki kyndon la mynjur mynta ka sngi da ka cabinet,” ong u Myntri Rangbah ka jylla u Conrad K Sangma sha ki lad pathai khubor hadien ba la pynïaid ïa ka jingïalang kynhun Myntri ha ka sngi baar.
Haba bynrap ka cabinet ka la ting ruh ïa ka Meghalaya Mental Health Care Rules, ka ban pynïoh ïa ki rukom treikam bad ki kam synshar jong ka mental healthcare institution ha ka jylla.
“Kine ki kyndon ki long kiba donkam bha bad ngi don ki jaka pule bapher bapher kiba don ka jingïateh ne ïatreilang bad ki jaka sumar, ki rehabilitation centre bad kiwei ki kam kiba ïadei bad ka koit ka khiah ka bor pyrkhat, bad kum ka jylla, ngim don ki kyndon ban pyntreikam ne ban pynïaid ne kam don ka policy kaba don ha ka jaka, kumta mynta ka sngi ngi la mynjur ïa kito ki kyndon,” ong u Sangma.
“Ngi la wanrah ïa ki rukom treikam kiba long kiba kongsan bad ban pynïaid ïa baroh ki jaka pule ka koit ka khiah kiba don bad kane ka dei baroh ka jingthmu,” u la bynrap shuh shuh.