Shillong, Lber 31:Ka Sorkar Meghalaya Democratic Alliance (MDA) hynne ka sngi palei kala mynjur ïa ka Meghalaya Minor Minerals Reclamation Fund Management Guidelines, 2022 ban pynjyrngam biang ïa ki khlaw ki btap bad ka sawdong sawdong kiba la julor na ka kam tih marpoh khyndew.
Ka Sorkar kala shim ïa kane ka rai ha ka jingïalang jong ka Kynhun Myntri bad pyntip ba ka Sorkar Jylla kala sdang ïa ka reclamation fund na ki minor minerals naduh u snem 2014 ban maramot ïa ka jingpynjulor mei mariang na ka daw ka jingtih marpoh khyndew, kaba la pynshong nongrim kat kum ka hukum ka Ïingkashari High Court.
“Halor kane, ka sorkar kala lum ïa ka pisa hynrei ym shym la don satia ïa ka kyndon (guideline) ban pyntreikam ïa kane ka pisa. Namar kata, ngi la thaw ïa ka kyndon bad mynjur mynta ka sngi” ula ong.
U Conrad u pyntip ba ka jingpyntreikam ïa kane ka song pisa yn leh da ka Governing Body ka ban khlieh da u Myntri ka Tnad Khlaw bad lyngba ka Executive Committee.
Kat kum ka jingong jong u, ka song pisa hi ka dei eh na ka bynta ban pynjyrngam biang ïa kito ki jaka kiba julor na ka jingtih ïa ki marpoh khyndew ba hap hapoh ki minor minerals bad kumjuh ruh ki major minerals, kaba kynthup ïa ka jingpyndap khyndew ïa ki par, thung dieng, iada ïa ki tyllong um bad kiwei kiwei.
Haba pynpaw ba kam don satia ka song pisa ba thikna na kane ka song pisa, u Myntri Rangbah ula ong “Baroh hi kan shong ha ki jingtyrwa ki ban wan na ki Tnad bapher bapher kiba la ithuh ba kin pyntreikam ïa kane ka song pisa kum ka nuksa, ka Soil Conservation, Water Resources, Mining & Geology, Forest, Pollution Board bad kiwei kiwei”.
