Mynjur ka Sorkar ïa ka jingdawa ki nonghikai Adhoc, shen yn rah ïatai ha ka Cabinet

Shillong, Jymmang, 12: Ka Sorkar Jylla ha ka sngi Palei ka la mynjur ïa ka jingtyrwa jong ka Federation of All School Teachers of Meghalaya (FASToM) hadien ba u Myntri Rangbah ka Jylla u Conrad Kongkal Sangma u la khot ïakren ïa ki nongïalam ka Seng.
Ha ka jingïakren bad ki lad pathai khubor hadien ka jingïakynduh ïa u Myntri Rangbah, u Nongaiktien jong ka FASToM u Samla Mayborn Lyngdoh ula ong, “u Myntri Rangbah u la pan por namarba ka File ba la pynkhreh na ka tnat Pule Puthi ka la poi artat sha ka Kynhun Myntri bad yn donkam haduh lai sien ïa ka Kynhun Myntri ban shong jingïalang bad ïa ka jingtyrwa jong ngi yn sa mynjur da ka Kynhun Myntri.”
Une u nongïalam ka FASToM u la kyntait ruh ban ïathuh eiei haba kylli hato ka Sorkar ka pdiang neem ïa ka jingtyrwa ban kyntiew ïa ka tulop.
“Ka jingkular kaba ngi ïoh halor ka jingtyrwa ban pynkiew ïa ka tulop kan long kaba ngi ladep dawa lane ka lah ban long kaba kham bha ruh. Ngin ïai ap ïa kata. Ïa ka jingtyrwa kaba ngi la phah nyngkong ki (Tnat Pule Puthi) la kham pynbha shuh shuh bad la kynthup lang ruh ïa ki nonghikai Science bad Hindi,” u la ong.
U la ïathuh ba u Myntri Rangbah u la ai ka jingkular ba lada kumno kumno ka Sorkar ka lah ban shim ruh ïa ka rai wat tang ha ka jingïalang banyngkong jong ka Kynhun Myntri bad kaba lah ruh ban shimpor hapoh shi bnai namarba ka jingïalang jong ka kynhun myntri ka ju long la kumno kumno shisien ha ka shiphew sngi.
“Ïa ka jingïakhih ngin ym pat pynkut hynrei ngin ap shwa. Katba ngi dang ap (ïa ka rai na ka Sorkar) ngin leit phai biang sha ki kamra klas,” u la ong.
Haba kylli, une u Nongaiktien jong ka FASToM u la ong, “hadien ba ngi la ïakynduh na ka por sha ka por ïa ki Ophisar jong ka tnat Pule Puthi ngi la sngewthuh ïa ka (jinghiran) ka pla tyngka jong ka Sorkar bad ngi la tyrwa sha ka Sorkar ban shu pynkiew da ka tulop kaba T.18 hajar bad ban pynkiew ïa ka jingsiew tulop kaba 5% manla u snem.”
Shwa kane, naduh ka por 1030 baje mynstep, la sakhi ba ki nonghikai na kylleng ka rilum Khasi, Jaiñtia bad Garo ki la ïalum lymbung ha lynti ïaid kjat ha IGP Point hadien ba ka FASToM ha ka sngi Balang ka la byrngem ba ki nonghikai kin pynlong ruh da ka jingsahmiet ha surok katba u Myntri Rangbah ka Jylla um pat khot ïakren ïa ki nongïalam jong ka Seng.
La sakhi ruh ba ki Pulit ki la pynkhlaiñ bha ïa ka jingpahara ha ophis Main Secretariat bad ha IGP Point kum ka jingpynkhreh lypa ïoh mih kino kino ki jingjia.
Hynrei hadien ba u Myntri Rangbah u la khot ïakren bad ai ka jingkular ha ki nongïalam jong ka FASToM ha ka por shiteng sngi, ki nonghikai ki la leit phai noh sha la ing da kaba suk mynsiem.
U Myntri Rangbah u Conrad Sangma ha ka jingïakren bad ki lad pathai khubor u la ong, “ka tnat Pule Puthi ka ladep ïakynduh ïa ki nongïalam jong ki nonghikai Adhoc kiba la pynpaw halor ka jingdawa ban kyntiew ïa ka jingsiew tulop na kaba ju siew baroh shikatta. Ïa mynta ka File ka dang ïaid bad tad ynda ka la poi ha ka miej jong nga, ngan sa pynkhreh ban rah ïatai sha ka jingïalang jong ka Kynhun Myntri.”
Rah ka HSPDP hakhmat ka MDA ïa ka jingeh ki nonghikai Adhoc: Ka Hill State Peoples Democratic Party (HSPDP) ha ka sngi Palei ka la pynsngew hakhmat ka jingïalang jong ka Coordination Committee jong ka kynhun Meghalaya Democratic Alliance (MDA) kaba bat ïa u lakam synshar halor ka jingdawa jong ki nonghikai skul Adhoc.
Ha ka jingïakren bad ki lad pathai khubor, u President jong ka Party u Bah KP Pangniang u la ïathuh ba u Myntri Rangbah u Conrad Kongkal Sangma u la ïathuh ba ka tnat Pule Puthi ka dang bishar halaor kane ka jingdawa namarba ka Sorkar ka don hapdeng ka jinghiran pisa.
Kane ka jingïalang jong ka MDA ka la long hashwa ba ki nongïalam ka FASToM kin ïakynduh ïa u Conrad Sangma.