Shillong, Nailar, 09: Ka Kynhun Myntri jong ka Sorkar Jylla ha ka sngi Thohdieng ka la mynjur ïa ka Farmers Empowerment Commission Amendment Bill, 2024.
Ha ka jingïakren bad ki lad pathai khubor u Myntri ka tnat Pule Puthi ka Sorkar Jylla u Rakkam A Sangma u la ong ba ka jingwanrah ïa ka jingpynbeit thymmai kan plie lad ban kyntiew ïa ka rta jong u Chairman na ka 65 snem sha ka 70 snem.
U la ïathuh ba ka Kynhun Myntri ka la mynjur ruh ïa ka Benami Transaction Prohibition Rules, 2024 ban ailad ïa ki jingujor ban pdiang da ki ophis jong ki Deputy Commissioners jong ki District.
U Sangma u la ïathuh ruh ba la mynjur ïa ka Meghalaya Public School Service Rules, 2024 ha kaba lai tylli ki Public School,, kata ha Shillong, ha Tura bad ha Jowai la kynthup lang. “(Baroh shikatta ki snem) kam don ka Service Rules na ka bynta ki nonghikai bad ki Principal kiba trei hapoh ki Meghalaya Public School bad ha ki Public School bapher bapher jong ka jylla,” u la bynrap.
Ha kajuh ka por, ka Kynhun Myntri ka la mynjur ruh ïa ka Meghalaya Subordinate Water Resources Engineering Service Rules, 2024.
