Shillong, Jymmang 06: Ka Sorkar Meghalaya Democratic Alliance (MDA) hynne ka sngi thohdieng kala mynjur ïa ka song pisa ba kot $98 million ban kyntiew ïa ka eco-tourism (kam jngohkai ïa ka sawkong sawkun ba ithiang ka mei mariang ryngkat ka jingpynriewspah shuh shuh bad ban ai jingiada) hapoh ka Jylla.
Kane ka rai kala mih na ka jingïalang jong ka Kynhun Myntri haba pyntip ba kane ka song pisa ka dei kaban mang na ka Externally Aided Project (EAP) jong ka Meghalaya Eco Tourism Infrastructure Development Project (MEIDP).
Haba ïakren bad ki lad pathai khubor, u Myntri Rangbah ka Jylla Conrad Kongkal Sangma ula ong ba kane ka project ka dei na ka bynta ban tei ïa ki jingtei bapher bapher kiba ïadei bad ka eco-tourism ha Jylla Meghalaya.
Kane ka eco-tourism project ka kynthup ïa jingpynitynnad bad pynriewspah ïa ki jaka ba khring lem bad ka jing shna ïa ki jingtei ba donkam na ka bynta ki nongshangkai ha kylleng ki jaka. Kawei pat ka long ban pynthymmai ïa baroh ki jingtei kiba la rim ha ki jaka jngohkai, ban pynbha ïa ka lynti ïaid kjat ba sahnam kum ka David Scott Trail bad ruh ïa ki jingdonkam bapher bapher jong ki jaka jngohkai ka Jylla.
U Conrad ula pyntip ba ïa kane ka EAP la mynjur da ka Kynhun Myntri kat kum ka jingdonkam bala buh da ka NDB bad ka Sorkar India.
Haba ban jur ïa ka jingdonkam ban nang pynroi ïa ki shnong ki thaw, u Myntri Rangbah ula ong “Lyngba ka EAP, ngin sa ting ïa ki shnong ki thaw bad ban nang pynjanai ïa ki project kam jngohkai ha kine ki shnong. Kin don ruh katto katne ki bynta ba ïadei bad ka jingpyniasoh surok”.
U Conrad ula ong ba ki don shibun bah ki kam ha kane ka project hynrei haba kyllum lang ïa baroh, ka dei ka jing pynroi ïa ki jingtei ba donkam ha ki jaka jngohkai ka Jylla.
