Mynjur ka Sorkar ban pynkynriah noh ïa ki Harijan sha ka Revenue Land

Shillong, Ïaiong 25: Ka Sorkar Jylla hynne ka sngi nyngkong kala mynjur ban pynkynriah noh ïa baroh 342 tylli ki Longïing jong ki paid Harijan na Them Metor sha ka Revenue Land ne ka jaka Sorkar.
Ïa kane la pyntip da u Symbud Myntri Rangbah ka Jylla Bah Prestone Tynsong hadien ka jingïalang bad ka kynhun jong ka Harijan Panchayat Committee (HPC) ha ka sien ba-ar hynne ka sngi.
Kat kum ka jingong jong u, ka Harijan Panchayat Committee kala mynjur ban kynriah noh na Them Metor, Them Iew Mawlong halor ki katto katne ki kyndon.
“Ka HPC ka kwah ba baroh 342 tylli ki Ïing, kiba la dep shim jingkheiñ ha u snem 2008, yn pynkynriah tang ha kawei ka jaka kaba dei jong ka Sorkar Jylla, ïa kaba ngi la ai ka jingmynjur” ula ong.
“Kila buh jingkylli ruh ba hadien bala dep shna ïa ki Ïing, ba kin long trai ïa kine ki ïing pateng la pateng. Kine ki dei ki mat ba ki kwah ban ïoh ïa ka jingshai ba bniah na ka Sorkar.Namar kata ngi la bthah ïa ka Tnad Urban Affairs ba kan pynkheh ïa ki jingtyrwa ba bniah” ula bynrap.
U Bah Prestone u ïathuh ba ka Sorkar Jylla kala rai ban pynkhreh ïa ki jingtyrwa kaba bniah halor kane ka bynta.
“Hadien ba la dep kane ka kam, ngin sa phah ktah sha ki (HPC) bad hadien kata, kin sa iashong jingïalang biang bad ki briew ba sah ha Them Metor na ka bynta ban shim ïa ka rai ba khatduh halor kane ka kam” ula ong.
Haba pynpaw ba ka jingïalang ba bud ka lah ban long hashuwa ka 15 tarik Jymmang, u Symbud Myntri Rangbah ula ong “Ngi la bthah ïa ka Tnad Urban Affairs ha kaban pynkhreh ïa ki jingtyrwa ba bniah. Hadien ba ngi la aiti ïa kane ka jingtyrwa, ngin sa shong jingïalang biang bad ngin sa shim ïa ka rai ba khatduh”.
Haba kylli ïa ka jaka bala ithuh da ka Sorkar ban pynkynriah ïa ki paid Harijan na Them Metor, u Bah Prestone u pyntip ba ka Sorkar kam pat shim rai satia ïa kane. “Hooid, ngi la dep ithuh ym palat ïa 2-3 tylli ki jaka hynrei ngin sa lah ban ïathuh ha phi ïa ka jaka ba thikna hadien ba ka Tnad Urban Affairs kala pyndep ïa baroh ki jingdonkam ban buh ha ka jingtyrwa”.
Haba ïadei bad ka mukotduma ha Ïingkashari, u Symbud Myntri Rangbah ka Jylla ula ong ba kane ka mukotduma kan sa kut noh shisien ba ngi la dep pynbeit ïa kane ka kam.
“Kane ka dei ka jingïalang kaba ar bala pynlong halor ka hukum ka Ïingkashari. Ngin dang ïai bteng ban ïakren tad haduh kaba kut. Shisien ba ka Sorkar bad ka HPC kila mynjur lang, ngin sa file lang ïa ka affidavit sha ka Ïing kashari ba kan pynwai noh ïa ka mukotduma” ula bynrap.
Na ka liang u Secretary ka Harijan Panchayat Committee (HPC) u Gurjit Singh u pyntip ba ka HPC kala buh ïa ka jingtyrwa ba ka Sorkar ka dei ban ai haduh 10 acre ka jaka ban pynkynriah ïa ki Harijan na Them Metor, ka ba dei ban long hapoh ka European Ward.
“Baroh 342 tylli ki Longïing ki kwah ban ïoh iasah lang ha kawei ka jaka bad ka dei ban hap hapoh ka European Ward. Ka Sorkar Jylla ka dei ban mynjur ïa kane” ula ong haba bynrap “Lada ka Sorkar ka kwah ban pynkynriah ïa ngi ka dei ban shim bad pdiang ïa ki jingdawa ka HPC”.
Kat kum ka jingong jong u “Ka HPC kala dawa ba baroh ki Longïing (342) ki dei ban ïoh mar 200 square meter ka jaka ban shna ïing bad ka Sorkar ka dei ban bei ïa ka jinglut jingsep sha ki Longïing ba kin shna ïala ki jong ki Ïing ki sem. Ngim kwah satia ïa ki Ïing bun mala jong ka Sorkar”.
“Ngi la ïakynduh ïa ki Heh Sorkar mynta ka sngi bad ngi la buh ïa kine ki jingtyrwa ha kaba na ka liang ka Sorkar kin sa nang iashong pyrkhat ha ka taiew ban wan ban shim ïa ka rai” ong u Gurjit Singh.
Haba kylla la ki don ne em ki briew ba shong be-aiñ ha Them Metor, u Gurjit ula ong ba ym don satia lada khmih kat kum ka joint census bala leh ha u snem 2008. U ong ba bun na ki 342 tylli ki Longïing ki dei ki nongtrei Sorkar katba katto katne ki dei kiba don ïa ki dukan khaii bala seng la bun bun snem ha Them Metor.