Shillong, Nohprah 09: Ka sorkar jylla ka la mynjur ban pynkylla ïa ka Meghalaya Judicial Service Rules 2006 bad ka Meghalaya Higher Judicial Service Rules 2015 kaba donkam ïa ka jingpynbha ïa ka jingpynlong ïa ki exam, ki syllabus, bad ki rukom thungkam ha ki kam shakri ka aiñ ne judicial service.
Haba ïathuh ïa kane hadien ka jingïalang jong ka cabinet ha ka sngi baar, u Myntri Rangbah ka jylla u Conrad K Sangma u la ong, “Ïa kane la leh katkum ki jingmynjur kiba la wan na ka judiciary bad kine baroh ki dei na ka bynta ban pynlong ïa ki examination bad kum kiei ki exam ne kum kiei ki syllabus bad kumno ka jingthungkam bei beit kan jia, ka percentage jong kata bad kumjuh ruh ban peit ïa ki rukom treikam bapher bapher jong ka kam thungkam.”
Kawei ka mat kaba kongsan jong ki jingpynkylla kadei ka jingkynthup ïa ka jingtip ïa ka ktien lajong, Khasi ne Garo, kaba dei ka jingdonkam kaba kongsan.
“La ai jingmut, kum ka nuksa, ka jingnang jingtip ïa ka ktien Khasi lane Garo kaba long kaba long kaba kongsan, bad ngi hap ban pdiang ïa kine ki jingmynjur,” ong u Mynri Rangbah.
Kine ki jingpynkylla ki thmu ban pynkhlaiñ ïa ka jingthungkam ha ka judiciary bad ban pynthikna ba ki kyrtong kin don ïa ki sap kiba kongsan bad ka jingnang ban shakri ha ka state judicial service.
“Namar kata, kito baroh ki jingmynjur la leh bad ngi la mynjur bad pdiang ïa kine ki jingpynkylla,” bynrap u Sangma.
