Shillong, Naitung 12: Ka Kynhun Myntri ka Sorkar Jylla ha ka sngi Palei ka la ai jingmynjur ïa lai tylli ki Rule ki ban nang kyntiew ïa ka jingleh janai bad ka jingtreikam kaba shai ha ka bishar khaddar ïa ki kam bymman hapoh ka Jylla.
Ha ka jingialang ka kynhun myntri la ïathuh ba kine ki Rules ne kyndon ki kynthup ïa ka Meghalaya e-Shaksha Management Rules, 2025, Meghalaya Electronic Processes Issuance Service and Execution Rules 2025 bad ka Meghalaya Guidelines Community Services 2025. La khmih lynti ba kine ki rule kin pynjanai ïa ka rukom sumar ïa ki sakhi ba lum lyngba ki kor electronic, pynbeit ryntih ïa ki rukom pynïaid ïa ka bishar khaddar ha ki Ïingkashari bad ban ai ïa kiwei pat ki jait jingpynsajia ïa ki kam bymman barit baria bad kiwei kiba donkam.
Ha kaba ïadei bad kane haba ïakren sha ki lad pathai khubor hadien ka jingïalang ba la pynïaid da u Myntri Rangbah ka Jylla Conrad K Sangma, u Commissioner & Seceretary ka tnad Pohïing u Bah Cyril Diengdoh ula ong ba ïa kine ki Rule la ai jingmynjur hadien ka jingïasyllok kaba sani bad ka Ïingkashari Meghalaya High Court bad ka long shibynta na ki kam ban pyntreikam ïa ki Aiñ kam bymman ba thymmai – ka Bharatiya Nyaya Sanhita, Bharatiya Nagariksuraksha Sanhita, bad Bharatiya Sakshya Adhiniyam, kaba la sdang treikam naduh ka 1 tarik Naitung 2024.
Halor kane u Bah Diengdoh u la ïathuh ba ka Meghalaya e-Shaksha Management Rules, 2025 kan pynthikna ïa ka jingshngaiñ ki sakhi ba la thep ha ki kor electronic kum ki video bad ki dur, ha ki mobile applicaton ba la tip kum ka e-Shaksha. Ïa kine ki sakhi yn sa pynïasoh sha ka CCTNS system bad ICJS system, ka ban pynmih ïa u Unique ID bad pynthikna ba kan nym don ka jingpynjulor.
U la ong, “Baroh ki sakhi ba la lum da ki kor electronic, la ki dei ki video, ki dur la thep ha ki mobile app ba khot ka e-Shaksha, ka ban ïada ïa ka jingpynjulor da u code ba 16 nombar bad u hashtag bad ïa kine la pynïasoh sha ka CCTNS bad ICJS system (Interoperable Criminal Justice System), ban rah kum ki sakhi hapoh ka Ïingkashari haba bishar ïa ki kam bymman.”
Haba ïadei bad ka Meghalaya Electronic Processes Issuance Service and Executive Rules 2025, u Bah Diengdoh ula ong ba kane ka Rule ka shah ban pyndonkam ïa ki kor electronic haba khot hajir, warrant bad kiwei ki kam kashari, kaba pynduna ïa ka jingpyndonkam ïa ki kot bad kiwei pat ki jingdonkam.
Halor kane u Commissioner & Secretary ula batai ruh ïa ka jingthmu jong ka Meghalaya Guidelines Community Services 2025, ka ban pyntreikam ïa ka hukum ban shakri ïa ka imlang sahlang kum ka jingpynsaja ïa kito ki nongleh kam bymman barit baria, kum ka kam pynkhuid ïa ki jaka paidbah, ki hospital bad ki jaka pule.
“Kane kadei ruh kumjuh ka sienjam jingpynkylla thymmai kumba ngi tip haba u briew u la leh ka kam runar bad u la shah kem, ka jingpynshitom barabor ka dei ka jingshah shong along ne hap siew ka kuna. Hynrei mynta la wanrah da ka jingpynshitom kaba thymmai ban shakri ka imlang lang sahlang kaba mut ki jingpynshitom kiba rit baria na ka bynta ki jingleh bakla kiba rit ha kaba ka ïingkashari ka lah ban pynbna ki jingpynshitom da kaba phah pynkhuid ïa ki ward ha ki jaka sumar sorkar, ban pynkhreh ïa ka thup ki kot ne ban pynbeit ïa ki kot ha ki Library sorkar, ban pynkhuid ïa ki kamra klas ne bad ki municipal corporation ne ki nongtrei ba pynkhuid ba kynthup ka jingai rong ïa ki surok, ka jingphut ïa ki ñuit bad kiwei,” u la ong.
“Ban lumlang kine ki 3 tylli ki kyndon kiba leh kam runar kiba dei ban wanrah da kaba ïaid lang bad ka ri baroh kawei kumba la pynlong kongsan da ka MHA yn sa pyntreikam noh ha ka jylla hadien ba ka kynhun myntri ka la mynjur hadien ka jingïasyllok bad mynjur na ka Meghalaya High Court,” bynrap u Bah Diengdoh.
