Mynjur ka Kynhun Myntri ïa ka TFSSR, ka jingpynbeit thymmai ïa ka byelaws bad kiwei kiwei

Shillong, Risaw 15 : Ka Kynhun Myntri ka jylla ha ka sngi Balang ka la mynjur ïa ka Technical Financial & Social Service Rules na ka bynta ki municipal ha ka jylla Meghalaya.
Kine ki kyndon ki long shi bynta ban pynkhlain ïa ka jingtreikam jong ki municipal bad ki long katkum ki jingbthah bad ki jingai jingmut ba la ai da ka sorkar India, la ong u Myntri Rangbah ka jylla u Conrad K Sangma hadien ba la wai ka jingïalang jong ka Kynhun Myntri.
Ha kajuh ka por ka Kynhun Myntri ka la mynjur ruh ïa ka jingpynbeit thymmai ïa ka Meghalaya Building Byelaws.
Katkum ka jingong jong u, kane ka jingpynbeit thymmai ka thmu ban pynbha ïa ka jingpyndonkam ïa ka jaka, ban pynbeit ïa ki rukom ai jingbit, bad ban ailad ïa ka jaka kaba kham heh ban tei ïa ki iing.
Ka Kynhun Myntri ka la mynjur ruh ïa ka jingpynbeit kiba rit ïa ka Meghalaya Health Service Rules.
“Ka dei ka jingpynbeit kaba rit lane ka jingpynkylla kaba rit bad ïa kata la pynbeit da ka kynhun myntri, kaba dei ka Meghalaya Health Service Academic Rules, 2025,” la bynrap shuh shuh u Myntri Rangbah.