New Delhi Nailar 09: Ka Kynhun Myntri jong ka Sorkar Pdeng ba la pynïaid da u Myntri Rangbahduh ka ri, Narendra Modi, ka la mynjur ïa saw tylli ki bynta ba thymmai hapoh ka skhim sorkar pdeng jong ka Special Development Packages (SDPs) kaba la don lypa na ka bynta ka jylla Assam bad Tripura ha kaba ka jingpynlut baroh ka long T.4,250 klur.
Ki jingtip ba bniah:
T.500 klur na ka bynta ban kyntiew ïa ki jingdon jingem ha ki shnong/ki jaka ba shong ba sah ki Adivasi jong ka Assam katkum ka Memoranda of Settlement (MoS) la ïasoi da ka Sorkar India bad ka Sorkar Assam bad ki kynhun Adivasi jong ka Assam.
T.500 klur na ka bynta ban kyntiew ïa ki jingdon jingem ha ka thaiñ North Cacher Hills Autonomous Council (NCHAC) jong ka Dimasa National Liberation Army/ Dimasa People’s Supreme Council ba la sah ki briew ha ki shnong/ki jaka jong ka Assam katkum ka MoS ba la ïasoi da ka Sorkar India bad ka Sorkar Assam bad ki kynhun Dimasa National Liberation Army (DNLA) /Dimasa People’s Supreme Council (DPSC) jong ka Assam.
T.3,000 klur na ka bynta ban kyntiew ïa ki jingdon jingem ha ka Jylla Assam katkum ka MoS ba la ïasoi da ka Sorkar India bad ka Sorkar Assam bad ki kynhun ULFA jong ka Assam.
T.250 klur na ka bynta ka roi ka par jong ki riewlum ka jylla Tripura katkum ka MoS ba la ïasoi da ka Sorkar India bad ka Sorkar Tripura bad ka National Liberation Front of Twipra (NLFT) bad ki kynhun All Tripura Tiger Force (ATTF) jong ka Tripura.
Ka jingktah ha ka liang ka pisa tyngka:
Ka jingpynlut baroh jong ki saw tylli ki bynta ba thymmai ba la tyrwa kan long T.7,250 klur, ha kaba T.4,250 klur yn pynbiang hapoh ka skhim Sorkar Pdeng jong ka Special Development Packages ba la don lypa na ka bynta ka Assam (T. 4000 klur) bad Tripura (T.250 klur), bad ïa kaba sah T. 3,000 klur yn noh synniang da ka Sorkar Jylla Assam na ki jingdon jingem jong ki.
Na ka T.4,250 klur, ka jingpynlut kaba T.4,000 klur na ka bynta ka samoi kaba san snem naduh u snem mang tyngka 25-26 haduh u snem 2029-30 ka long na ka bynta ki lai tylli ki bynta jong ka Assam bad ka jingpynlut kaba T.250 klur na ka bynta ka samoi kaba saw snem naduh u snem mang tyngka 2025-26 haduh 2028-29 kadei na ka bynta shi bynta jong ka jylla Tripura katkum ka Memorandum of Settlements ba la ïasoi bad ka Sorkar India, ki Sorkar Jylla Assam bad Tripura bad ki kynhun riewlum jong ka Jylla ba ïadei.
Ka jingktah, kynthup ïa ka jingplie ki lad ïoh kam ïoh jam:
Ki projek ba ïadei bad ki jingdon jingem & ki lad kamai kajih kin plie ki lad ïoh kam ïoh jam. Kan ai jingmyntoi ïa ki samla bad ki kynthei lyngba ka jingkyntiew ïa ki sap, ka jingplie ki lad ïa ka kamai kajih, bad ka jingseng kam seng jam ha ka thaiñ. La khmih lynti ban wanrah ïa ka jingshongsuk jong ki shnong kiba shah ktah.
Ki Jingmyntoi:
Kane ka Skhim ka dei kaba la thmu kyrpang na ka bynta ki jylla jong ka thaiñ shatei lammihngi jong ka Assam bad Tripura. Kan kyntiew ïa ka jinglong ryntih lyngba: Ban kyntiew ïa ka jinglong jingman ha ka imlang sahlang bad ka ïoh ka kot jong ki kynhun kham shem jynjar ki bym shym la ïoh jingmyntoi ba biang na ki skhim Sorkar bapher bapher kiba la don lypa, ha kaba kane kan kyntiew ïa ki lad ïoh kam ïoh jam, pynbiang ki lad jingshakri ha ka koit ka khiah, kyntiew ïa ka pule puthi bad ka jingpyntbit bad ka ïoh ka kot lyngba ki kam kamai jakpoh na ka bynta ki samla bad ki kynthei; kyntiew ïa ka jingwan ki nongjngohkai pyrthei na kiwei pat ki bynta jong ka ri, da kaba thaw shuh shuh ïa ki lad ïoh kam ïoh jam bad ki lad kamai na ka bynta ki briew jong ka thaiñ shatei lammihngi.
Lyngba kane, da ki lak ngut ki briew Adivasi bad Dimasa ha Assam, ki briew kiba sah ha kiwei pat ki District bapher bapher jong ka Assam bad ki jaidbynriew riewlum jong ka Tripura kin ïoh jingmyntoi.
Kane ka dei ka sienjam kaba thymmai hapoh ka skhim jong ka sorkar pdeng kaba dang ïaid shakhmat jong ka Special Development Packages. Ki song jingïarap ba mynshuwa kiba la pynshong nongrim ha ka MoS (Nuksa., na ka bynta ki kynhun Bodo bad Karbi) ki la pyni ïa ki soh kiba bha ha kaba tei ïa ka shongsuk shongsaiñ bad ka roi ka par.
Ka Nongrim: Ïa ki Memoranda of Settlement la ïasoi hapdeng ka Sorkar India, ka Sorkar Jylla Assam bad Tripura bad ki jong ki jaitbynriew tynrai (ki kynhun Adivasi – 2022, DNLA/DPSC – 2023, ULFA – 2023, NLFT/ATTF – 2024). Kine ki MoS ki thmu ban kyntiew ïa ka jingsuk, ka roi ka par kaba kynthup lang, bad ka jingai jaka sah lyngba ki projek ba ïadei bad ki jingdon jingem bad ki projek ha ka imlang sahlang bad ka ïoh ka kot.
