Shillong, Iaiong 1: Ka Kynhun Myntri ka Jylla ka la ai jingmynjur kaba tang shisien ne One-Time Condonation ban ai jingithuh ïa ka jingkyntiew kam ïa ki nongtrei Adhoc kiba la shah thungkam pura hashwa u snem 2007.
Haba pynbna ïa kane, hadien ba lawai ka jingïalang jong ka Kynhun Myntri ha ka sngi Balang, u Myntri Rangbah u Conrad K Sangma ula ong, “Ngi lah ïakren ïa ka jinglong jingman jong ki nongtrei Adhoc kiba la shah thungkam pura kiba la rangbah ha ka kam bad kumjuh ha ka jingkyntiew kyrdan. Kumba phi lah ban kynmaw, ngi lah dep thungkam pura ïa ki kiba la shah thung Adhoc hashwa ka snem 2007 bad kumta ki la don bun ngut bad ngi la kyntiew kam ruh ïa ki”.
Ula ong ba ka jingbym shai ha ka rekod jong ka jingshakri ïa ka kam ka la pynslem ban ïoh ïa ka Pension, namar ba u Accountant General ula pan ïa ka jingpynshai la kin ïoh ïa ki jingmyntoi ka dei ban kheiñ naduh ka por, ba ki la sdang ban trei nyngkong eh ne naduh ba la kyntiew kyrdan ïa ka kam ka jongki.
“Ka la don katto katne ka jingbym shai bad kumta ngi lah rai ban thungkam pura noh ïa kito kiba la shah kyntiew kyrdan, khamtam kito kiba la shah kyntiew kyrdan ne tang ïa kito kiba shah kyntiew kyrdan kiba la leh katkum ka Service Rules bad ïaid katkum ka lynti treikam ha katei ka por ka dei kaba la bud na ka bynta kitei ki nongtrei Adhoc. Ngin ithuh ïa ki bad yn ai ha ki ïa ka lad kaba tang shisien ne One-Time Condonation bad kumta kine ki nongtrei kin ïoh ïa ka tulop katkum ka jingshah kyntiew kyrdan ka jongki”.
“Nga ong biang, tang ïa kito kiba la shah kyntiew kyrdan ha ka rukom kaba biang bad kiba la bud ryntih ïa ki kyndon aiñ bad ki jingbthah, ïa kitei ki jingkyntiew kam, ngi ngin ai ïa ka lad kaba tang shisien bad ngin ailad ba ka jingshah kyntiew kyrdan ka jongki kan ïoh ïa ka jingithuh khnang ba yn lah ban ai ïa ka Pension katkum ka kyrdan kaba ki bat” ong u Sangma.
U Myntri Rangbah ula pynkynamw ba ka sorkar kham hashwa kala dep ban thung kam pura ïa kumba 3,000 ngut ki nongtrei Adhoc kiba la shah thungkam hashwa jong u snem 2007.
