Shillong, Naiwieng 05: Ka kynhun Myntri ka sorkar jylla ha ka sngi baar ka la mynjur ban pynkylla thymmai ïa ka Meghalaya Forensic Science Laboratory Rules (MFSLR), 2021 na ka bynta ban thaw ïa bun tylli ki kam ne ki post hapoh ka mobile forensic crime scene units.
Haba kren sha ki lad pathai khubor u Myntri ka sorkar jylla bad u nongaiktien ka sorkar jylla u Bah Paul Lyngdoh u la ong, “Kane ka jingpynkylla ka kynthup ïa ka jingbuh ïa ka mobile forensic crime scene unit bad ka kynhun Myntri ka la mynjur ban pynmih khambun ki kam ha kine ki mobile forensic crime scene unit, ka ban pynsuk ha ka ban lap kloi ïa ki kam runar lyngba ki mobile unit. Ka kynhun myntri ka la mynjur ruh ban buh ïa ki ophisar bad yn ai ïa ki da ki kali khnang ban pynsuk ba kin lah ban lap kloi ïa ki kam runar.”
“Ngi la mynjur ruh ïa ka jingtyrwa ban don ki scientific officer, senior scientific assistance, scientific assistance bad laboratory assistance ha kylleng jong baroh ki district. Kane ka long kaba donkam halor ka jingshisha ba ka jinglap ïa ki kam runar kam dei hapoh ka bynta jong ki service rule tat haduh ba ka cabinet ka la shim ïa kane ka kam mynta ka sngi,” u la bynrap.
Haba kylli, na ka liang u secretary in-charge home (police) u Bah Cyril Diengdoh u la ong ba katkum ka criminal code bathymmai, ka BNSS jong ka snem 2023, kaba la treikam naduh ka 1 tarik u Naitung ha une u snem, ka don ka jingdonkam hapoh ka 176 (3) jong ka BNSS ba katto katne ki kam runar kiba shyrkhei, na ka liang ki mobile forensic investigator kin hap ban shim ïa ki sakhi satar.
“Kane kadei ka jingdonkam jong ka aiñ. Ban pyneh ïa ka jingdonkam jong ka aiñ, ka sorkar ka la mang ïa kine ki post kham hashwa. Ka rukom pynrung kam ka la sdang bad ha ka jingshisha ka don ka jingdonkam ba ïa ki service rules dei ban pynthymmai naba kane ka jingphiah kaba thymmai hapoh ka forensic science directorate ba la khot ka mobile forensic crime scene unit, ka ban lum ïa ki forensic evidence naduh ka jaka ba la jia ki kam runar. Kane ka dei ka jingdonkam jong ka aiñ namar kata ka kynhun myntri ka la wanrah ïa kane ka jingpynkylla ban kynthup ïa kine ki kam kiba thymmai kiba la dep ban thaw ki ban ïaid lang bad ki service rules,” u la ong.
Shuh shuh u Bah Diengdoh u la pyntip ba ka sorkar ka la shim ïa ki sienjam ha kine ki snem ba la leit ban pynthikna ba ka forensic science lab kan dei ban long kaba la pynthymmai pura.
“Kum ka nuksa ha u bnai Jylliew mynshem snem, ka sorkar ka la kyntiew kyrdan ïa ka forensic science lab sha ka directorate ba pura hapoh ka tnat home police. Kham mynshwa ka la treikam hapoh ka ophis DGP. Mynta ka sngi ngi la ong ba ïa kine ki post la dep ban thaw kaba long katkum ka aiñ bad khlem pep la dep mang ruh ïa ki mobile van bad katto katne la dep ruh ban pynthikna,” u la ong.
U la ong ba ki la don bun ki division hapoh ka forensic science lab ha Shillong katba ka jingdonkam jong ka aiñ ka dang don, ka kam thungkam ruh kan dang don, bad yn kyntiew kyrdan ruh ïa ki ophisar, ki sap jong ki bad kiwei ki jingdonkam.
Haba kylli u Bah Diengdoh u la ong, “Kane ngin hap ban peit naba ngam don ïa ki jingshisha bad nga kaei kaba slem bad kaei kaba la pynslem. Ngim don ruh ïa ka DNA unit hapoh ka forensic science laboratory. Lada ïa ki nongmuna la phah shabar jong ka jylla kata ka lah ban dei ka jingdonkam jong ka aiñ.”
